admin
Thokozile Mbedzi
LUMTSHAYE lwameqa uvalo omunye umlimi welokitshini leMkoba 14 eGweru obevula insimu yakhe efica ama-AK47 amathathu ephakathi kotshani kuyonale iviki.
Indoda le, amapholisa agodle igama layo ngenhloso yokuyivikela, kubikwa ivumbulule inkafulakufa lezi ezintathu iphakathi kokulungiselela ukulima ensimini yayo.
Ekhuluma lentatheli kaMthunywa uMnumzana Philani Sibanda uthe lokhu ephethe izibindi ngezandla njalo kakuqedisisi ukuthi kungani inkafulakufa lezi bezifihlwe ensimini.
“Lokhe sisevalweni ngembhobho le ebonakeleyo ngoba asazi ukuthi kungani ibifihlwe phakathi kwensimu. Asikwazi lokuthi abanikazi bayo ngobani kunye lenjongo yabo.
“Sonke silapha sisevalweni ngodaba lolu asazi ukuthi izikhali lezi zifike njani emasimini njalo imonakalo eyenzakeleyo ngembobho akula oyaziyo kodwa siphange sabikela amapholisa ngodaba lolu,” kulandisa uMnu Sibanda.
Isikhulumi samapholisa elizweni, uAssistant Commissioner Paul Nyathi ebuzwa ngodaba lolu uthe solufikile ehofisini yabo njalo basaluphenyisisa.
“Udaba lwembobho etholakale eGweru sisaluphenyisisa,” kuphetha uAsst comm Nyathi.
Online Reporter