adminJohas Moyo
ZILOKHE zibambe owangaphansi izakhamizi zelokitshini leLuveve leGwabalanda kulandela ukufa kwenye indoda ibulawa butshwala ngeviki ephelileyo.
Umuyi uSolomon Moyo kubikwa utshwala bethathankawu besebuyikudla kwakhe yikho nje buze bamusa kogoqwanyawo.
UMthunywa uzwe ukuthi umuyi wanatha othathankawu abathathu kanti sezembele ingcwaba lakhe.
UMthunywa ukhulumisane loMnumzana Thulani Ncube obengumngane kamuyi njalo benatha bonke oveze ukudabuka lokuhlukumezeka kakhulu ngokwenzakale kumngane wakhe.
“Sisele sidanile sonke nje silapha. Umngane wethu uhambe engagulanga njalo engasivalelisanga. Okudanisayo yikuthi utshwala ubebunatha ebuthanda kodwa hatshi ukuthi aze afe nje kabuhlungu kanje,” kutsho uMnu Ncube.
Ibuzwa ngalindaba intombi kamuyi, uCelin Dube uveze ukuthi lokhe engakukholwa okwehlela ijaha lakhe ngoba utshwala babungeke bumkhweze i-high blood pressure.
“Ngambona esengasazwisiseki ethi ubona izithunzi zabantu abanengi andubana simbizele i-ambulensi.
Ngicabangela ukuthi kungabe kukhona okwenzakalayo ngaye ngoba ebengaguli,” kutsho uNkszn Dube.
UMthunywa uxhumane njalo loKhansila Tamani Moyo yena obike ukuthi umbiko wokufa kwendoda ngemva kokunatha kakhulu utshwala uwuzwile.
Online Reporter