adminYiNtatheli kaMthunywa
ZIBUKELE ibhayisikopo yamahala izakhamizi zelokitshini leCowdray Park endaweni eyaziwa ngokuthi kuseMpompini ngemva kokuba amanina amane evubane kwabaluthuli ebanga uBen 10.
Isisanasana lesi senzakale ngoMgqibelo kuviki ephelileyo lapho uNkosazana Pretty Makoni (36), uNkosazana Lucy Nkomo (32), uNkosazana Prisca Mbele loNkosazana Loveness Phiri abadindane khona kabuhlungu bebanga uMnumzana Abel Ndlovu (23).
Umfakazi oqotho uNkosazana Betty Moyo ubikele uMthunywa ukuthi impi le iqale ngemva kokuba uMakoni ethole uNkomo eme loMnu Ndlovu.
“Impi le iqale ngemva kokuba uMakoni ethole uMaNkomo eloMnu Ndlovu wasembamba ngekhola yeyembe wamtshaya ngempama ethi kungani esima lendoda yakhe. Ngemva kwalokho uMaNkomo laye wambisela bahle baqala ukulwa.
“Kuthe ngesikhathi uMakoni sekhulelwa nguMaNkomo uMaPhiri wathela etshaya uMaNkomo okudale ukuthi uMaMbele laye ancedise uMaNkomo njengoba bengabangane. Sithe sesibona ukuthi uMakoni lomngane wakhe sebelimele sasesilamula noma nje uMakoni ubesekhumuke amazinyo amabili,” kulandisa uNkszn Moyo.
UMnumzana Richard Sibanda ongumngane kaMnu Ndlovu uchaze ukuthi uNdlovu uthandana lababili babo kuphela.
“Mina uNdlovu ngumngane wami omkhulu ngakho imfihlo yakhe yonke ngiyayazi. Kathandani lamanina la womane kodwa uthandana loMaNkomo loMakoni kuphela okuyibo abaqala ukulwa. Laba abanye babethelela ngoba bengabangane kuphela, kabathandani laye,” kutsho uMnu Sibanda.
Ebuzwa ngale indaba uNkszn Nkomo uvumile ukuthi walwa loNkszn Makoni wathi kakwazi ukuthi wayembangisani ngoba nguye owamsukelayo.
“Kuliqiniso sibili ukuthi ngalwa loMakoni ngoba wangithola ngizimele empompini kuloNdlovu yena wafika wangisukela wangitshaya lami ngambisela. Okokuthi ngithandana loNdlovu ngamanga kaMakoni, nguye othandana laye.
“Mina ngendile ngakho ngicela ungangibhali kuphephandaba ngoba umkami engakuzwa lokhu engangixotsha sibili,” kuchaza uNkszn Nkomo.
UNkszn Makoni ubikele intatheli ukuthi okwenza walwa loNkszn Nkomo yikuthi wayesemthathela indoda yakhe.
“Mina ngilwile sibili loMaNkomo ngoba uyangidelela ungithathela indoda yami engazitholela yona kudala njalo laye uyakwazi ukuthi ngeyami. Okungizwise ubuhlungu yikuthi ngibathole bebonke empompini njalo ngihlala ngisizwa ukuthi bayathandana,” kuphetha uNkszn Makoni.
Imizamo yokukhulumisana loMnu Ndlovu yehlule.
Online Reporter