admin
Ethel Ncube
NGENXA yobukhali kulendoda yeLupane egongode umkayo ngembiza isola ukuthi kungani emphakulele inyama encane.
UJohn Sibindi kubikwa kumaviki amabili adluleyo utshaye umkakhe uNkosazana Linet Moyo ngomphika ekhanda ngoba emfakele amaqatha enyama amalutshwana.
Esinye isakhamuzi esabhula umlilo lo uNkosazana Maureen Sibanda uveze ukuba ubaba lo uvele yisihwaba.
“Ubaba lo uvele uyahlupha ngokudla pho njengoba khathesi inyama isidula kangaka usezadlalela eziko efuna ukubona ukuthi kuphekwe amaqatha amangaki.
“Ngangizihlalele ngezwa uMaDewa esehlaba umkhosi ngagijima ngayafika khona ngathola ehlaba umkhosi indoda isimgongode ngomphika ekhanda isithi umfakele amaqatha amalutshwane,” kubika uNkszn Sibanda.
UMthunywa uxhumane loNkszn Moyo owatshaywa ngembiza ovumileyo ukuba babebanga inyama.
“Inyama eyayithengiwe yayincane, ubaba wathi kungani efakelwe amaqatha amancane wadobha umphika engalanini wangitshaya ekhanda ngahlaba umkhosi ukuze omakhelwane bazongilamulela,” kubika uNkszn Moyo.
Ekhuluma lentatheli uMnu Sibindi uphike wemba phansi ukuthi watshayela umkakhe ukuthi umphakulele inyama encinyane.
“Lokho okhuluma ngakho angikwazi, kangizange ngimtshaye unkosikazi ngathi kaphathe kuhle isitshebo,” kuphetha uMnu Sibindi.
Online Reporter