Online Reporter
Bhekimpilo Tshalibe
KULENINA elileminyaka engu-50 yokuzalwa, elifunde ukuthi ngempela akuqili lazikhotha emhlane, kulandela ukugwetshelwa ukuyapika inyanga ezingu-24 ejele ngemva kokutholakala lilecala lokuqila elinye iUS$4 100 ye-stand.
ULucia Sibanda ohlala eCowdray Park koBulawayo, umiswe emthethwandaba esetheswa icala lokuqila elinye inina imali engange US$4 100, esithi ulabantu abaziyo abasebenza ekhansilini abangamncedisa ukuthi athole i-stand.
Umtshutshisi kulelicala uNkosazana Mandrela Chisiwa uthe uSibanda wathatha imali yomngane wakhe lo nyakenye, ngenyanga kaNtulikazi, wayitshayela esikhewini.
Kuvele ukuthi umamangala walanda uSibanda endlini yakhe eCowdray Park, ngemva kokuba elayelwe ukuthi wazana labantu abasebenza ekhansilini yakoBulawayo abangamncedisa ukuthi athole indawo yokuhlala.
Umsolwa wafika wavuma, wathi kumele abhadale iUS$4 700, umamangala wamtshiyela iUS$100 enye bavumelana ukuthi uzabe eyibhadala mbijana mbijana ize iphele.
Kubikwa ekupheleni kwenyanga kaNtulikazi, umamangala wabuyela wayamnika iUS$4 100 njalo wacela ukubona ama-receipts ukuze abe lobufakazi bokuthi usebhadele ekhansilini, umsolwa wamthumezela kuWhatsApp.
Umtshutshisi uveze ukuthi umamangala wahamba laleyo receipt ekhansilini bafika bamtshela ukuthi kayisiyo yeqiniso.
Umantshi, uNkosazana Learner Khumalo, ngemva kokulalelisisa indaba le uthole umsolwa elecala, wathi ayepika inyanga ezingu-24 ejele, wabuye wamesulela inyanga eziyisificaminwe mibili, kukhangelelwe ukuthi angenzi icala elifanayo kuminyaka emihlanu elandelayo.
