admin
Johas Moyo
ZISELE zitshwaqe umzimba izakhamizi zeBinga kulandela isihluku esenziwe ngenye indoda evuke ubhova yatshaya umkayo ngensimbi wafa qede yazibophela.
Isiga lesi esihlasimulisa umzimba senzakale mhlaka 17 Ncwabakazi esigabeni seLubanda ngaphansi kwenduna uSaba.
Umuyi uStephen Mwembe kubikwa waxabana lomkakhe ngesizatho esingavelanga wavuka ubhova wamtshaya ngensimbi okwabangela ukuthi afe.
Kuzwakale ukuba ngehola lesine ekuseni uMwembe waxabana lomkakhe, uLizzie Muzamba phambi komntanabo oleminyaka engu-16.
Kubikwa ababili laba baqala ukulwa okwabangela ukuthi umntwanabo agijime ayebikela omakhelwane abafica uMwembe esebulele umkakhe ngensimbi.
UMthunywa uzwe ukuthi omakhelwane befika uMwembe wayesebalekile basebelandela unyawo lwakhe bamthola esezibophele esihlahleni ngomchilo.
UMthunywa uxhumane lenduna yesigaba uSaba yena oveze ukuthi kuliqiniso ukuthi kulendoda etshaye umkayo ngensimbi wafa.
“Kuyadanisa ukuzwa isihluku esingaka esigabeni. Ngikhuthaza izakhamizi ukuthi zingathathi umthetho ziwufake ezandleni zawo. Nxa kulohlupho kabathole usizo kwabanye abemuli,” kutsho induna uSaba.
Omele isikhulumi samapholisa esabelweni seMatabeleland North uEglon Nkala uvumile ukuthi umbiko lo sebewamukele wasekhuthaza uzulu ukuthi azame ukukhumisana umlotha ngezinye indlela nxa kulengxabano.
“Samukele umbiko wendoda ebulele umkayo ngokumtshaya ngensimbi andubana izibophele. Sikhuthaza uzulu ukuthi nxa kulokungezwani phakathi kwezimuli badinge uncedo emapholiseni kumbe kubakhokheli bezigaba,” kuphetha omele isikhulumi samapholisa.
Online Reporter