admin
Cornelius Luphahla
ZIKHUZA imihlolo izakhamizi zesigabeni seMathetshaneni, eTsholotsho ngemva kokuba omunye usobhuku wakule indawo enze isimanga ngokukhipha ilitshe lengcwaba (i-tombstone) lomntanakhe okucatshangelwa ukuthi yikho okubangele ukuthi kufe amalunga emuli yakhe edlula 10.
Imbedumehlwana le yenzakale ngoMpalakazi kumnyaka ophelileyo lapho uMnumzana Jarada Ncube owabhujelwa khona ngumntanakhe uQoko Ncube kwathi ngemva komngcwabo bafaka ilitshe uyise wasala elikhipha walifaka endlini.
Kuzwakale ukuba uNcube kazange abikele amanye amalunga omdeni ngemva kwalokho abantu emulini le baqala ukufa ngendlela engacaciyo okwadala ukuthi bacabangele ukuba baqedwa yikufakwa kwe-tombstone le endlini.
UMthunywa uvakatshele kule indawo wakhulumisana lesinye isihlobo sikamuyi esiziveze ngokuthi nguNcube nje kuphela sachaza ukuthi kuliqiniso sibili ukuthi abomdeni wakwabo baqedwa yikufaka i-tombstone le endlini.
“Kuliqiniso sibili ukuthi kwathi ngemva kokubhubha kukaQoko uyise wathatha i-tombstone eyathengwa ngumalukazana wakhe wesibili wayisusa ethuneni wayifaka endlini. Ngemva kwalokho abantu bahle baqala ukuphela emdenini, ngikhuluma nje sokwafa abedlula 10.
“Khona ngokwesiko okwenziwa nguNcube kufana lokufaka ikhanda lomuntu endlini yena efile ngakho lisuka liqede abantu,” kutsho uMnu Ncube.
Omunye umama wakulo umdeni ongathandanga ukubethwa ngegama uthe uzwa ubuhlungu ngesenzo sikanguMnu Ncube ngoba kwasokusifa ngitsho labantwababo.
“Mina okungizwisa ubuhlungu yikuthi uNcube ngumuntu omdala njalo uyakwazi ukuthi kuyazila ukufaka ilitshe ebelisethuneni endlini kodwa yena wakwenza. Khathesi sokwaphela abantu kanye labazukulu bethu thina singazi lutho,” kutsho umama lo.
UMnumzana Reford Ndebele oyisakhamuzi sakule indawo ubikele intatheli ukuthi uMnu Ncube ulokuganga thize akwenzayo ngoba uthi ulala emenyezwa yizinto njalo sezambulala amehlo.
“UNcube vele ulokuganga sibili ngoba uthi ulala emenyezwa yizinto ebusuku zimbuza imibuzo eminengi engazwakaliyo. Izinto lezi kuthiwa yizo esezambulala amehlo njalo sezaxotsha umkakhe endlini yabo yokulala.
Uselala yedwa, umkakhe laye selala yedwa. Isimanga yikuthi abahlala laye bathi abazake bazizwe izinto zakhona,” kutsho uMnu Ndebele.
UNkosazana Gumbo ongumkamuyi uNcube ebuzwa ngalindaba uthe yena wezwa kuthiwa ilitshe leli litshontshiwe wabuya wezwa sokuthiwa ligcinwe nguyisezala endlini kwamangalisa.
“Mina ngathi ngisuka ngemva komngcwabo womkami ilitshe lalisengcwabeni ngezwa sokuthiwa litshontshiwe ngamangala kakhulu kodwa ngemva kokubuzisisa ngezwa sokuthiwa ligcinwe ngubabazala endlini.
“Lokhu lakho kwangimangalisa kodwa ngabuya ngathi kutsho ukuthi kulungile ngoba kwenziwe ngumuntu omdala owazi ngcono.
“Engingakwaziyo yikuthi abantu laba ababhubha ngemva kokubhubha komkami baqedwa yikufakwa kwelitshe endlini kumbe yini,” kutsho uNkszn Gumbo.
Usobhuku uMnu Ncube ebuzwa ngalindaba uvumile ukuthi wakwenza lokhu, wengezelela ngokuthi kukhona okulala kumhlupha ebusuku.
“Kuliqiniso sibili ukuthi ngakhipha ilitshe engcwabeni lomntanami ngaligcina endlini.
“Ngakwenza lokhu ngingacabangeli ukuhti kungangilethela udubo endlini. Sasivumelene lomalumakhe angikwenzanga ngedwa lokhu. Silibuyisele salakhela ngesamende kuviki ephelileyo. Ukuthi kwafa abantu abanengi ngemva kwalokho lakho liqiniso elibuhlungu kodwa ngeke ngitsho ukuthi baqedwa yikufaka ilitshe endlini.
“Okunye njalo okuliqiniso yikuthi kulezinto ezilala zingihlupha ebusuku kodwa lokhu ngeke ngilibikele okunengi ngoba ayisikho kwenu njalo kangilazi,” kutsho uMnu Ncube.
UNkkz Ncube ebuzwa ngalindaba uvumile ukuthi ulala yedwa wathi okwenza alale yedwa yikuthi sekhulile.
“Mina ngilala ngedwa sibili ngenxa yokuthi sengikhulile njalo ngeke ngikhulume indaba ezinengi ezizangibophisa,” kutsho uNkkz Ncube.
Online Reporter