Online Reporter
YiNtatheli kaMthunywa
Ifindo likasofa silahlane lisengozini yokuqanyulwa kulandela ukuvela komkhuba okubikwa wenziwa ngelinye inina wokuhlanganisa ukudla elikuphekayo lomchamo kanye lokugcina osalayo embodleleni eliyifihla phakathi kwe-wardrobe yabo.
Lokhu kwethuse uArtwell Matemera oseveze ukuthi induku yakhe kayisasebenzi kusukela ngelanga abona lokhu.
Unkosikazi wakhe, uWinny Johannes uthe umkakhe ubeletha amadlecatsha endlini ngokunjalo usenyamalalelwe yimpahla yakhe yangaphakathi enengi.
UMatemera wenze isicelo sokuvikelwa kuJohannes athe uyamhlukuluza ngamazwi kunye lokumtshaya.
UMatemera uthe unkosikazi wakhe waqala ukuhlanganisa umchamo kunye lokudla ngoba enakanela ukuthi kathembakalanga emtshadweni wabo.
“Mina ngisebenza eBindura, unkosikazi wami uhlala khonapha eHarare, saqala ukuxabana ngize ngimbambe ukuthi kathembekanga emtshadweni.
“Waqala ukwenza izinto ezingazwisisekiyo, efaka umchamo ekudleni ngasenginanzelela ukuthi uhlanganisa ukudla lomchamo lomunye umuthi ongathi yimpuphu engingawaziyo.”
UMatemera ubuye watshengisa inkundla imbodlela athi yayilomchamo owawuhlanganiswe lomuthi.
“Ngathi ngimbuza ngembodlela le engayithola phakathi kwe-wardrobe yethu, waqala ukungithethisa esithi yikho okwenzakalayo nxa ungelamali.
“Wangethusela wathi ufuna ukungigwaza ngengqamu ngingamlwisa, ngasikwa isandla,” utshonjalo.
“Sonke isikhathi nxa sihlangana emacansini uyachela umuthi engingawaziyo emzimbeni wami, uyangitshaya abuye angalise ukubona abantwabami.”
UJohannes wethesa uMatemera icala lokumhlukuluza lokuletha amadlecatsha akhe endlini yabo.
“Ngempela imbodlela ngeyami, kodwa ngiyisebenzisa ukugcina imithi njengoba ngithengisa imithi.
“Wangitshiya ngizithwele umthwalo wamaphahla, ngalwa laye ngenxa yomkhuba wakhe wokuthatha impahla zami zangaphakathi ezinika amatshamali akhe.
“Wabuya labantu balapho esihlala khona esithi ngamthelela isiki,” utsho kanje.
Umantshi uMeenal Narotam ukhuthaze ababili laba ukuthi bayedinga ukucetshiswa andubana anike uMatemera incwadi yokuvikelwa kuJohannes.
