Sidumisile Mabena
Rutendo Nyeve
KWEHLE iyezi elimnyama kumphakathi weMasikili, eJambezi, eMatabeleland North kulandela ukuzwa ngomntwana oleminyaka emithathu obulewe yingwenya ngesikhathi unina lomfowabo bethiya inhlanzi emfuleni uMatetsi.
Isehlakalo lesi senzakale ngoLwesibili ngehola lesithathu emini.
Umuyi, uGrace Chafudzika, wayehamba lonina, uNkosikazi Tariro Tsonzowori (33) lomfowabo oleminyaka engu-12, uGerald Mpala.
Isikhulumi samapholisa elizweni uCommissioner Paul Nyathi ekhuluma ngaloludaba uthe:
“Ngiyakuqinisekisa ukuthi sithole umbiko ngokwedlula emhlabeni komntwana kulandela ukubulawa yingwenya kumfula uMatetsi. Kusaqhunywa uphenyo njalo okunengi ngesehlakalo lesi kuzalandela.”
Abafakazi abaqotho babike ukuba imuli le ibithiya inhlanzi duzane lebholoho leMatetsi ngesikhathi ingwenya itheleka, izama ukudonsa uGerald, ophangise wahlaba umkhosi wabaleka.
Ingwenya le kubikwa isuke lapho yabamba uGrace obeseduzane lamanzi, yamdonsela emfuleni.
Unina uzame wahawula ukuthi axotshe ingwenya le ngokuyijikijela ngamatshe kwehlula.
Amapholisa eJambezi, esebenza ndawonye logatsha lweZimbabwe Parks and Wildlife Management Authority (ZimParks) kubikwa bazame ukudinga isidumbu somntwana.
Lakhathesi sisadingwa.
Online Reporter