Online Reporter
Ethel Ncube
KUDABA olutshwaqisa umzimba, kulomntwana oyinkazana oleminyaka eyisithupha ofe ngemva kokudlwengulwa ngabafana abathathu betshintshana babuye bambhaxabula ngesigodo.
Isehlakalo lesi senzakale ngoMvulo elokitshini le-Upper Rangemore koBulawayo.
Kubikwa abafana laba ababili abakuGrade 7, omunye uleminyaka engu-14 omunye ule-13, loyedwa okuGrade 6 okungasatholakalanga iminyaka yakhe, abangabelokitshini elifanayo badonsela osengumuyi kwenye indlu engakapheli ukwakhiwa, bafika bambhaxabula andubana bamdlwengule.
Intatheli izwe udletshana lokuthi osengumuyi wake wadlwengulwa futhi ekuqaleni komnyaka ngumntaka-makhelwane kodwa indaba le yambambathwa, kayizange ibikelwe amapholisa.
“Umntwana lo kazange avikelwe, uke wadlwengulwa ngenyanga kaNhlolanja ngomunye umntaka-makhelwane kodwa abazali bakhetha ukukhulumisana besesaba ukuthi bazakhangelana njani.
“Khathesi nanko ubuye wahlukuluzwa futhi, unina wayalala engazange ayemdingela usizo kodwa edlwengulwe ngabafana abathathu yena emncane,” kutsho omunye ufakazi ongathandanga ukuqanjwa ngebizo.
“Ngitsho lekuseni kulokuthi avukele esibhedlela unina wakhetha ukuvuka esenza imisebenzi yakhe esiyathanyela kodwa umntwana embikele ukuthi uphathekile emzimbeni.
“Ekuphendukeni kwakhe yikho lapho athola umntwana esedlule emhlabeni watshayela uyise womntwana ucingo owathi kamlinde uyeza kodwa waze waphenduka ebusuku esevela emsebenzini kwayikhona besiyabikela amapholisa,” kuqhubeka ufakazi lo.
UMsekeli wesikhulumi samapholisa koBulawayo uAssistant Inspector Thandekile Ndlovu uqinisekise ngesehlakalo sokufa komntwana lo.
“Samukele umbiko womntwana oleminyaka eyisithupha ofe ngemva kokubhaxabulwa lokudlwengulwa ngabafana abasakhula abathathu bentshintshana.
“Mhlaka 4 Nkwenkwezi ngehola lesithupha ilanga selitshonile, umntwana lo wafika wabikela unina ukuthi uzwa ubuhlungu esithweni sakhe sangasese, esifubeni kunye lekhanda. Wabuye wambikela ukuthi ubhaxabulwe ngesigodo ngabafana abathathu abaqambayo,” kuchaza uAsst Insp Ndlovu.
Ebusuku, umntwana waqhubeka elokhu ekhala ngobuhlungu bomzimba wonke unina emthukisa.
“Ngosuku olulandelayo ekuseni, umama wananzelela ukuthi indodakazi yakhe isidlule emhlabeni kwabikelwa amapholisa. Sikhuthaza abazali labakhangela abantwana ukuthi balandelele lapho abantwababo abadlala khona ngaso sonke isikhathi futhi baqinisekise ukuthi abasali bebodwa, ikakhulu ngezikhathi zantambama.
“Ukunakekelwa kwabantwana kubalulekile ukuze bangaze bahlukuluzwa,” ngu-Asst Insp Ndlovu.
