admin
UYISE wayekhanuka inyama wasethuma indodana yakhe ukuthi iyokweleda ebhutsha.
Kodwa indodana kayizange inike uyise inyama, yazidlela yodwa okuyikho okwabangela ukuthi baxabane.
Indodana kubikwa yangena endlini, yathatha ingqamu yagwaza uyise waze wafa.
Indoda eleminyaka engu-27 ibotshwe ngamapholisa ngoMgqibelo kulandela ukubulala indoda eleminyaka engu-54 eOrient Hills squatter camp, entshonalanga yeJohannesburg.
“Kucatshangelwa ukuthi umetheswacala kanye lomuyi babengekhaya ngesikhathi ingxabano iqalisa,” kutsho uSergeant Kgomotso Mogwere.
“Umetheswacala wasuka ngekhaya waphenduka ngemva kwesikhatshana wavula umnyango waqonda ekamelweni lokulala likayise, lapho afika wamgwaza kanengi elele.”
Umetheswacala esenze lokhu wacela ezinyaweni.
UMogwere uthe amapholisa athola isidumbu sikhangele phezulu njalo sixhonxwe indawo ezinengi emzimbeni phezulu.
“Kutholakale isikhali esicijileyo eceleni kwesidumbu sathathwa ukuze sisetshenziswe njengobufakazi,” kutsho yena.
Isehlakalo lesi sitshiye izakhamizi zendaweni le zethukile.
“Sethukile njalo sidanile ngasikhathi sinye,” kutsho omunye umakhelwane ebikela intatheli.
“Ixhegu leli besilalo emini khathesi kalisekho. Ukufa kulula.”
Omakhelwane bathe ikhehla leli belithengiselwa inyama ngesikwelede ngoba belithembekile.
“Asazi ukuthi kungani umfana lo ebeligovu wangafuni ukwabelana loyise inyama,” kutsho omunye umakhelwane.
“Uyise nguye obezayibhadalela leyo nyama.”
Umetheswacala ubotshwe ngelanga ebusuku. — Ubulembu
Online Reporter