. . . UProphet Chiza wethula i-anointing oil

NguEmmanuel Ndlovu
UMPHUROFETHI uBlessing Chiza okhokhela ibandla le-Eagle Life Assembly ukhangelele ukuqoqa umhlangano ozahuga inkulungwane zabantu koBulawayo lapho abazaphiwa i-anointing oil elamandla okubhidliza iziqalekiso lemimoya emibi.
Lumkhosi uzaqhutshwa mhlaka 29 Mbimbitho enkundleni yeZimbabwe International Trade Fair (ZITF).

UMfundisi Ernerst Zichawo oyisikhulumi sebandla leli uthe lamafutha angcwele azaphiwa abantu mahala.

“Ukusetshenziswa kwe-anointing oil kukholo lwesiKhristu kwaqalisa kudala ngamaqhawe okholo afana laboAbrahama, Mose labo Davida phakathi kwabanye.

“Lebhayibhili elingcwele lalo liyakusekela ukusetshenziswa kwamafutha angcwele ukuze abagulayo basile labahlutshwa yiziqalekiso.

“Lamafutha angcwele azaphiwa abantu abizwa ngokuthi yi-The yoke destroyer, ngoba abhidliza zonke iziqalekiso lakho konke okubi okugqilaza abantu kulezinsuku,” kulandisa uMfundisi Zichawo.

Ubuye wathi ngomnyaka ka2011 lapho abaqala ukunikeza khona abantu lamafutha elizweni leZimbabwe kwabonakala izimanga ezinkulu empilweni zabantu. Kubikwa abantu abagogekileyo, impumputhe lezacuthe kanye labagulayo basila ngemva kokusebenzisa i-anointing oil le.

“Abazathola lamafutha la bazabuya baphiwe ama-DVD amabili azabafundisa kuqala ngendlela eqondileyo njalo esebhayibhilini yokuwasebenzisa.

“Lokhu sikwenza ngoba sesananzelela ukuthi abanye bamane basebenzise lamafutha ngendlela engaqondanga.

Amafutha la amele umoya oyingcwele njalo owasebenzisa ngokholo uyabona izimanga empilweni yakhe zisenzakala,” kugcizelela umfundisi Zichawo.

Ubuye wathi bakhangelele ukuhuga abantu abavela ezindaweni ezitshiyeneyo ezigoqela iGwanda, Victoria Falls,  eSigodini, Gweru, Kezi, Hwange, Harare kanye laseBotswana.

Kukanti abantu kubikwa bazabuya bathokoziswe ngabahlabeleli abagoqela uMinister Takesure, uMathias Mhere, Gospel Power, Flame B, Family Voices kanye leEagle Life Band.