admin
Khulu
Kangendanga njalo kabangikhombisi
Umbuzo
KHULU kwenziwa yini bonke abangani bami engakhula labo batshadile mina ke kuyala sengize ngicabanga ukuthi mhlawumbe ngilomnyama. Ngileminyaka engu-39 kangikaze ngikhonjiswe.
Impendulo
Akulalutho olalo, imvamo yabantu abanjengawe, umuhle kakhulu njalo uthanda ukuthi nxa uphakathi kwabantu ukhulume ngembeko yokuziphatha abesilisa babesebesithi ungumtshumayeli. Sifuna ukulungisa linto yokuthi bakubone. Angiselaphi mina, ngiyancedisa nje kancane. Thatha uvela bahleke lomlomo mnandi lomchithazulu legumalala lomphafa uhambe uyemfuleni lomunye umuntu oyisihlobo sakho. Faka lezizihlahla phakathi kwenditshi ugeze ungaqeda gebha igodi etshebetsheni ubusuchithela umuthi lowo kulelogodi, usuqede ukugeza, umbokothe ngenditshi obugezela kiyo, uyigqibele ngetshebetshebe. Suka lapho uye ngekhaya. Ungakwenza mhlawumbe duzane lomfula oletshebetshebe enengi. Akukuzame sibone ukuthi akulandwayi ozazisondeza phansi kwakho.
Kangithandi umamazala
Umbuzo
Khulu ngicela izeluleko bakithi. Umamazala wami uyangihlupha. Ngileminyaka yokuzalwa engu-20 ngende ngomnyaka ophelileyo kodwa umamazala kafuni kungibona uthi yena kukhona intombazana ayefuna ukuthi ithathwe ngumntanakhe kungakho mina ngifana nje lesiqalekiso kuye. Uyahlupha lumama kafuni kungibona ngihlezi phansi kumele ngihlale ngisebenza ngaso sonke isikhathi njalo uhlala engitshela ukuthi ngimubi njengenunu. Ngikhathele sengize ngicabanga ukubuyela ngakithi losane lwami. Umamazala sihlala sonke.
Impendulo
Zwana Nakanana, ibhayibhili lithi, intombi noma ijaha bazatshiya abazali babo, laba bobabili bayokwakha umuzi wabo bandise isizwe sabo. Kungakho ke; zamani ukudinga eyenu indawo yokuhlala litshiye umama endlini yakhe.
Udubo lapha yilo angihlambazi ngiyalibikela lomhlaba wonke umuntu ongumama uleziko lakhe umkulu wakhe, imbiza zakhe. Pho wena nxa ususebenzisa into zikanyokozala yena abe sesebenzisani. Into akubangisa yona liziko. Unyokozala watshiya ingakibo wazozala umkakho pho ke nxa ususithi angakuphekeli wena, abe esesenzani unyokozala. Zwana mzukulu, akulamuntu wesintwana okuthiwa mubi. Ububi busenhliziyweni yomuntu. Usane lolu alusilo lwakho kodwa ngolwenu lejaha lakho. Lina lobabili selilimile insumu yavuthwa, pho ukuba yinunu kungena ngaphi wena usulomntwana. Mhloniphe unyokozala ngokumtshiya lembiza zakhe ngesihle. Zitshayeleni ihlahla lejaha lakho limenzele konke lisemzini wenu.
Online Reporter