admin
Mthwakazi kaNdaba ngiyazi ukuthi abanye besebelolukuluku lokuzwa ngezesiKhristu kuphephandaba likaZulu njengoba nje sesiside isikhathi zingekho kodwa-ke lamhlanje lize levithikazi lentombi elicula ingoma zokholo, kaliculi nje ingilosi yezulu ingumfana.
Ingilosi le eze lephephandaba likaZulu nguSisa Dube owaziwa ngokuthi nguZodwa Mthembo kwezokholo. Kule iviki ofuna ukuphakama kwezevangeli nansi ingxoxo emnandi phakathi kukaSisa Dube (SD) lentatheli yephephandaba likaZulu uCornelius Luphahla (CL).
CL: Akutsho ngamafitshane ntombendala mayelana lembali yakho kanye leyokucula kwakho?
SD: Mina ngazalwa mhlaka 2 Mpandula ngo 1980 esigabeni seSomgolo eLupane. Kwathi ngo 1986 ngayangena uGiredi 1 esikolo seSomgolo ngaze ngayaqeda uGiredi 7 ngo-1992. Ngaqhubeka-ke ngezifundo zami ngayangena uFomu 1 eMagwegwe Secondary School koBulawayo ngo-1993 ngaqeda uFomu 4 ngo-1996. Ngemva kwalokho ngayahlala ekhaya eSomgolo kwathi ngo 2008 ngaya kwele South Africa ukuyadinga umsebenzi.
Ezokucula ngaziqala ngisafunda e-primary lapho ngiku-school shoir ngaqhubeka njalo ngihlabela ngaze ngayafika e-secondary. Njengomuntu owayekhonza ngangihlabela njalo ku-choir lapho engangikhonza khona kuSeventh Day Adventist Churh.
Ngathi sengiseSouth Africa ngo-2010 ngaqala-ke ukuhlabela lapho engasungula khona iqembu elalithiwa yi-Sisters of Paradise ngilomngane wami uSithembile Sibanda. Sacula okwesikhatshana sisonke ngasengisungula elami iqembu ngo-2015 elibizwa ngokuthi Zodwa Mthembo. Kuleliqembu sicula siyisithupha, kugoqela mina, uVeronica Ncube, Similo Ncube, Shylen Moyo, Lyton Ndlovu loJeconia Dube.
CL: Tshela umphakathi vithikazi ukuthi sowakhipha amadlalade amangaki njalo abantu bathini ngomculo wakho?
SD: Njengomculi ngethuba ngisacula loSithembile sakhupha idlalade elilodwa elithi Mhla ujesu ebuya. Njengoba nje ngisungule elinye iqembu kumnyaka ophelileyo sesikhiphe njalo idlalade elilodwa elithi Ulidwala.
Ngakho-ke lelidlalade abantu asebelizwile bayalijabulela kakhulu njalo basikhuthaza ukuthi siqhubekele phambili sihlabela singadeli ngoba siyabajabulisa. Lokhu kusichazela ukuthi ngokuya kwesikhathi umculo wethu uzathandwa phose nguzulu wonke.
CL: Chaza kabanzi ngilosi ukuthi lonyaka ukhangelele ukwenzelani uzulu njengomculi we-gospel?
SD: Mina njengomculi wezokholo lwesiKhristu ngikhangelele ukujabulisa uzulu ngamandla lonyaka ngokuvakatshela indawo ezinengi ezehlukeneyo ngitshaya ingoma ikakhulu emakhaya lapho engingakavakatsheli khona. Yikho-ke engizakwenza ama-shows ami ngizwisa abantu umculo wami. Okunye njalo ngisazokhipha elinye idlalade elizajabulisa uzulu wonke.
CL: Bunzima bani oyake uhlangane labo njengomculi njalo nkuthazo bani oyipha abaculi abasacathula vithikazi?
SD: Njengomculi osacathula sengihlangane lobunzima obukhulu kakhulu obugoqela ukuswela imali yokukhipha idlalade kanye lokuthenga imitshina yokukhiphisa idlalade. Okunye njalo njengomculi ongakaziwa kakhulu imali yokuzithuthukisa iyasikhathaza njengeqembu njengoba nje singakatholi abasincedisayo.
Ngakho kubaculi abasacathula ngithi kabaqinisele bengalahli ithemba noma kunzima baqhubeke behlabela bazaze bethuthuke. Okunye njalo ngithi bonke abahlabeleli baqala behlupheka bezama ukuzithuthukisa baze bathuthuka ngakho labasasungula kabathembele eNkosini bengadeli kuzaze kulunge.
Online Reporter