admin
Ngiyabenyanya abesifazane
Khulu ngiyindoda engathathanga. Mina okwenza ngingafuni ukuthatha yikuthi ngiyenyanya omama. Angazi ukuthi ngithini kodwa ngingacabanga ukuthi bayake baye emfuleni ekupheleni kwenyanga ngizwa ngisenyanya.
Ngake ngajola lomunye udade owayelitshapha. Ngelinye ilanga ngathola etshwathike ipulasitiki egcwele ama-pads ebhokisini ngaphansi kombheda esenuka phu. Ngakhipha mhlalokhu khulu ngahle ngamxotsha endlini yami umama lo. Kusukela mhlalokho ngiyenyanya omama Khulu. Sengihlale iminyaka phose emine ngingakhombisanga. Nceda khulu.
Impendulo
Habe, isintu siyatsho ukuba zonelwa mvu nye sibili. Kodwa lokhu owakubona kulo umama akutsho ukuba uzahlala usukubona kuye wonke owesifazana. Ukuya esikhathini yindlela yabo bonke abesifazana kungakho ke, abesilisa kufanele samukele konke lokhu. Into engafunekiyo yikuba umama aziphathe kubi nxa esesikhathini, okunjengokuba abonise owesilisa izinto ezimbi. Ungaba lakho ukuba uzitholele omunye umuntu ongaphila laye kube ngumuntu ohlanzekileyo. Igama lakho lokujola kalihlanzekanga mzukulu wami. Nxa udinga owesifazana, dinga iluba lakho elihle ozazibula ngalo njalo uzigqaje ngalo, hatshi ukuhamba ujola nje, yikho uzahlangana lezinto ezinje.
Kangitshelanga ukuthi ulabantwana
Ngiyindoda eleminyaka engu-28. Uhlupho lwami lumi kanje. Ngagada umtshova lomunye umama. Ngesikhathi ngisemtshoveni izigqoko zakhe zazitshengisa imilenze okwenza ngathatheka ngasengiphosa ilizwi. Sathandana kwaze kwafika kusibanga sokuthi azithwale. Umama lo wasesithi ngilobole. Mina njengomuntu owayesephelelwe ngayalobola.
Ngesikhathi ngisiyalobola ngangingazi ukuthi ulabantwana. Ngamangala sengisizwa abantu besithi kimi lo nguye othethe uNakazibani.
Ngemva kwalokho umama lo wabuya labantwabakhe sahlala sonke. Yimi esengibagcina. Uhlupho lwami yikuthi mina ngalobola ngingazi ukuthi ulabantwana. Ngenzeni ngoba lokhu kuyangihlupha? Kwezinye izikhathi ngize ngifise lokubaleka.
Impendulo
Kulusizi mzukulu, ukuba wena wakhombisela umuntu ukubona amathangazi akhe kuphela. Esintwini kuthiwa inkiwane enhle phakathi ibolile. Wena wabona amathangazi ungazi ukuthi kuboliwe ngaphakathi. Ngelinye ilixha, kuthiwa ungagamula isihlahla uthathe lamaxolo aso, pho wena kutheni usufuna ukwehlukanisa isihlahla lamaxolo aso nje? Eqinisweni, wawungeke wehlukanisa umfazi labantwabakhe, kungaba kuhle ukuba umtshele iqiniso, uzikhulule uhambe ngoba wonke umntwana okhulayo udinga ukuba lonina hatshi ukukhula eseyintandane wena uhleli lonina. Ukubaleka akusiyo indlela enhle. Hlalani phansi njengabantu abadala likhulume, livumelane, lawe ube ususuka ke, ukuze laye asale ezitholela ofuna isihlahla lamaxolo aso.
Online Reporter