admin
Kuyehlula ukuthi ngizithwale
NGITHEMBA uqine saka Khulu. Ngingumama owendileyo njalo mina lomkami besihlezi kuhle. Silendlu njalo bubili bethu siyasebenza kodwa Khulu imali esiyitholayo isingathi ayiseneli ngenxa yohlupho esibhekane lalo. Khulu sengileminyaka engu-17 ngalotsholwa kodwa inzalo iyala. Kwezinye izikhathi ngiyafikelwa ngumkhumbulo wokuthi kwelinye ilanga ngizanika umkami indlalifa kodwa kuyehlula. Okunye osekungikhathaza kakhulu yikuthi lezihlobo zomkami sezinyenyeza ngendaba le. Umkami kakaze atsho lutho kodwa sengisesaba ukuthi kungenzakala kwelinye ilanga uzangitshiya kumbe athathe omunye unkosikazi wesibili ngoba efuna indlalifa. Ngenzeni Khulu?
Impendulo
Mzukulu ngithanda ukuthi wazi lokhu kanye labanye phakathi kwethu abalohlupho olufanayo ukuthi kulezizatho ezehlukeneyo ezibangela ukuthi owesifazana aswele inzalo. Labo abake baba lemikhuhlane ethelelwana emacansini (STIs) kuyenzakala ukuthi behluleke ukuba labantwana. Kuthi labo abake bakhipha izisu kanye labalesilumo esiyindoda labo bandise ukubhekana lohlupho olufanayo. Kukhona njalo abaphupha besemacansini labantu besilisa, kuthi kwezinye izikhathi bayazithwala babelethe njalo emaphutsheni, ukuphupha ugula ngezinye izizatho ezenza umuntu abe lohlupho lolu. Kwezinye izikhathi uyabe ubotshiwe kungenzakala ukuthi watshelwa ngumuntu ukuthi kawusoze ufe wabamba umntwana ngezandla zakho. Izizatho lezi engizibalisileyo ngezinye ezimqoka ezibangela ukuthi umuntu angazithwali. Kungakho nxa ulenhlupho lezi kulezo ezidinga odokotela vakatshela esibhedlela ukuze uhlolwe kubonakale imbangela, ezinye zakhona ziyaqondiswa ucine usumphethe umntwana ngezakho izandla. Kuthi imimoya-ke yona ifuna ukuxotshwa.
Kangiseyiyo indoda
KHULU ngilohlupho olukhulu, iqolo lami libuhlungu njalo lesitho sami kasisavuki. Khulu lanxa ngiphakathi kohlupho lolu kodwa sengifuna ukuthatha. Kwezinye izikhathi ngingaya emacansini, iqolo lami lisala liqaqamba okumangalisayo.
Impendulo
Mzukulu ungajahi ukuthatha ngaphandle uhlupho lolu olalo luze lulungisiswe. Ungajaha ukuthatha wena ulohlupho olufana lalolu yikho okucina kubangela ukuthi ucine usehluleka ukuzala. Gijima jaha uyedinga uncedo kumajaha lamantombazana angaphansi kweZinatha labanye abalencwadi ezibavumela ukwelapha. Ungakwenza lokhu mzukulu uzabona lomuzi wakho uzaqina ngoba phela vele umuzi yindlu yokulala. Ungekela ukukwenza lokhu ungaqali ukuthi kusasa wethese umkakho icala ngoba uyabe edinga umuzi lapho okulendoda elamandla eqinileyo. Kodwa ungakayi kulabo abelapha ngesintu qala uyebonana labodokotela ukuze bakuhlole, mhlawumbe ungathola usizo. Okungenza ngithi uye kudokotela yikuthi kawusachazanga ukuthi suke wayakudokotela na. Kuyelapheka mzukulu.
Online Reporter