admin
Kuyini engingakwenza ukuthi ngiqhelise induku yami kancane?
KHULU ngithemba uphilile. Ngiyabonga ngokuphathisa abantu kuhlelo lwakho inhlupho zalamuhla. Umbuzo wami uwodwa nje qha. Kanti nxa ulijaha usazi ukuthi ulenduku encinyane kuyini ongakwenza ukuthi uyiqhelise kancane? Ngisesesikolo kodwa ngiyesaba ukuthi mhlawumbe angisoze ngenelise ukuzala ngingakhula. Nceda khulu.
Impendulo
Lapha ngizaphendula ngibhekise kwabesilisa bonke, mzukulu. Ubukhulu kumbe ubuncane benduku kabutsho lutho enhlanyelweni kumbe emacansini. Into enkulu yikwazi ukudlala umdlalo ungangena emacansini. Bakhona abantu abathi belenduku encane, amphenyaphenye owesifazana, agomele, akhuze imihlolo ngokukhwelisa, abubule, njalo aze agomele. Kuthi labo abale nkalakatha, kube ngokhonapho khonapho, athi umuntu ebona “ugogo” ahle akhuphe uluju lonke acholise umtanabantu nje engazange angene entweni, umdlalo uhle uphele. Njalo induku kasiyo ehlanyelayo, ubukhulu bayo abutsho ukuthi uyazala kumbe hatshi. Iloba inhlanyelo esele emnyango, ilakho ukuzingenela kuhle iyelungisa inzalo. Okwakho ongakufisa yikuba iqolo liqine ubelamandla okudlala umdlalo kabanzi njalo ngobunono lobuciko obujabulisayo.
Umkami ungizwisa ubuhlungu emacansini
Khulu umkami ungizwisa ubuhlungu nxa sisemacansini. Yena kala sikhathi sokungiphulula lokungijabulisa embhedeni lokhu abakuthi yi-romance. Nxa sesiphakathi komdlalo wethu ungizwisa ubuhlungu angikaze ngikholise emacansini. Okungizwisa ubuhlungu yikuthi yena nguye yedwa umuntu wesilisa engimaziyo kwezamacansi kodwa kalasineke umane angeqele nje njengeqhude.
Impendulo
Kuqakathekile ukuba wena lomkakho, kelixoxisane ngendaba yamacansi, njalo libonisane ukuba lifuna ukuyiphatha njani. Kungenzeka ukuba laye nje wenza into angayaziyo, mhlawumbe ayicabangelayo angelaqiniso layo. Kuhle-ke ukuba lixoxe ngakho. Kufanele ukunanzelele ukuba akusimlandu wakhe ukuba akudlalidlalise, lokhu kungumlandu wenu lobabili ukuba liphululane libambane kamnandi inyama zize zivume, uzuzwe umuntu esephefumulela phezulu amehlo esengani uphethwe yibuthongo kumbe ulengumbane. Ungahlali ulindele yena kodwa lawe nxa umdlalo usuqala kufanele uthathe isabelo sakho njengo mama, uphenduke isigelekeqe. Lingenza lokhu lizabona ubunandi bempilo yenu njalo lomendo uzakuba luluju oluhle kakhulu. Akudingeki ukuba wazi abesilisa abanengi kodwa lungisanini indaba yenu lonke. Lina ngobubili benu lilomlandu wokujabulisana emacansini. Kungenzeka ukuba laye ufela ngaphakathi.
Umka mnewethu ufuna ngilale laye
Khulu ngihlala lomkamnewethu elokitshini khonapha koBulawayo. Udubo yikuthi umfowethu usebenza eGoli kungakho-ke kumaviki edluleyo umkakhe ubengibizela endlini yakhe yokulala wasesithi ngihlale embhedeni. Ngemva kwesikhatshana sizixoxela waqala ukungiphulula umlenze. Mina ngahle ngeqa ngaphuma endlini ngayavakatshela abangane bami. Ngithe ngiphenduka wangibuza ukuthi bengibalekelani ethi kumele sibe-close ngoba ubhudi wami engekho.
Impendulo
Uyindoda mfanawami ngokuzibamba utshiyane lokungcola okunje. Yibo laba abantu esithi yimihlobo engalondwa nhlanyelo, indumba eyiziqhuqhumbo. Indaba owaye funa ukukunika yona ilezidumbu phansi, njalo abanye bafa befungelane ijoyi elilamakhala abomvu. Lingazwanana lophumamphume linikane konke hatshi umfazi. Ungavele ungene elujwini lukamfowenu lingafa lingabonani ngalihlo. Zama ngedlela zonke ukuzivikela ngokuhamba uyezidingela lawe okwakho ozazidlela utshaya impembe, ungafihlanga lutho. Kumele wazi ukuba okulempondo akufihlwa emgodleni, ungakwenza kuzavela kuphela njalo kube lutsheko oluzakungcolisa impilo yakho yonke, njalo olungagezekiyo. Zigeze ngokuhlala kude lengcekeza enje. Nxa elendlala kutheni engahambi ayedinga umkakhe okunguyena owasuka kibo emlandile. Engakuphikelela kuhle ukuba umazise ukuba uzatshela umfowenu. Kodwa sekufanele unanzelele ukuba kusasa engatshibilika athi wena nguwe obucela njalo ufuna ukumbamba ngamandla. Nanzelela indlela oziphatha ngayo kuye.
Abazali bami bathi ngiyesokwa kodwa mina ngeyesaba
Khulu ngileminyaka yokuzalwa engu-14. Abazali bami bathi ngiyesokwa eNew Start Centre kodwa ngiyesaba. Ngiyesaba ukuzwa ubuhlungu njalo angiboni ukuthi kuzanginceda ngani. Ngibatshele njani ukuthi kangifuni kusokwa mina?
Impendulo
Jahana ngibona usuvulekile amehlo njalo usungaba lakho ukuqathanisa okuhle lokubi. Okufanele kwenzakale ngomzimba wakho kumele kube yilokhu okufunayo wena hatshi okufunwa ngabazali. Usulalo ilungelo lokuxoxisana labo ubabonise ukuba wena kawufisi ukusokwa okwakhathesi. Kungenzeka ukuba ukufise ngesinye isikhathi kodwa hatshi okwamanje. Kuhle ukuba uphumele egcekeni mfana wami ubazise iqiniso.
Online Reporter