admin
Khulu
Ngihamba labantwana yini ngisiyakwenda?
Khulu: Ngicela ukubuza ukuthi nxa ngisiyakwenda kodwa ngilabami abantwana ngihamba labo yini kumbe njalo bayasala ngakithi?
Impendulo
Into yokuqala yisivumelwano phakathi kwakho lendoda efuna ukukuthatha. Njengomthetho othi isihlahla sibuthwa lengatsha kanye lamahlamvu aso, lapha kusebenza isivumelwano senu lobabili. Kuyenzakala ukuthi wena uhlala labantwabakho ngaleyondlela nxa ususuka emzini omdala uhamba labo. Akusoze kwenze ukuthi uthi wena kabaye kugogo wabo ngoba sekufike isilo lapha ekhaya, kodwa nxa abantwana laba bebehlala kwenye indawo lizabathatha ngolunye usuku.
Umendo wami awusemnandi
Khulu: Linjani? Ngilohlupho. Ngingumama oleminyaka engu-33. Ngendile kubaba ole-52. Ubaba lo wangithatha esehlukene lonkosikazi wakhe bevele omunye ehlala kwelinye idolobho omunye ekwelinye. Uhlupho nantu Khulu, ubaba usebuyisene lalo umama futhi njalo uselomakhwapheni ahlanyisana laye. Lumakhwapheni ulokuthumela ama SMS kumkami ukuba aqaphele ukutshiswa ngamanzi lokunye okunengi. Ngingagada laye ibhasi uyathumela indoda yami iSMS kuthiwe ngilaye. Ngenzeni Khulu?
Impendulo
Into yokuqala engithanda ukuthi ngiyazi yile, indoda le iyakunanza ngothando langakho konke njengasekuqaleni kwenu yini? Kuzo zonke iziphithiphithi lenhlupho ozibonayo lozizwayo zivela kuyo yini indoda yakho na? Zwana, umakhwapheni lowo mthathe njengothuli lwamadube ebalekela isilwane esibhongayo sona sizaphinda sithule singenzi lutho. Into eliqiniso ngomyeni wakho akakhuli uthanda ukuba yiliqhwa kokuphela. Kulesisikhathi sakhathesi umuntu onjengaye wenqabele ukuhlangana laye emacansini ungazivikelanga ngoba engakuthelela imikhuhlane ethelelwana emacansini. Nxa engala lokhu mtshele ukuthi wena ufuna ukuzivikela kungakho kungcono liyehlolwa igazi lindawonye ukuze lazi izimo zenu ngoba phela kulezinsuku abantu bakhuthazwa ukuthi bathembeke kubomkabo.
Qinisa ukuthula kodwa umtshele ukuthi masinyazana nje njengomzingeli uzathi ejikijela esixukwini kanti silomvundla. Maye babo angaze akuphathele igazi lomvundla wasezixukwini ubusufela amafufu ngenxa yalokhu. Angilayo inkuthazo yokwehlukanisa abantu, ngiba lesimemezelo sayo nxa indoda isidinga indlela yokubulala umkayo ngamacansi. Angiloyisi mzukulu ukuthi ufe usufike kimi. Nxa ezithanda izidwaba zakhe lezo kehlukane lawe.
Kuyini ukuvunula?
Khulu: Ngilethemba lokuthi uphile saka. Ngilombuzo lapha. Ngihlala ngibona ubhale izihlahla lemisebenzi yazo kodwa umbuzo wami ubususiba yikuthi kuyini ukuvunula?
Impendulo
Ngiyathaba kakhulu mzukulu, abanengi bangakwenza inhlekisa ngokubuza kwakho wona lo umbuzo kanti kufanele uwubuze. Nxa sesibuya eqinisweni elipheleleyo umuntu wonke wesintwana kuyimfanelo yokuthi nxa kuhlwile esesiyalala uyageza umzimba wakhe ngitsho ubuntu bakhe qho, abugezwa ngesepa ngenye indlela ngingathi udade akagezwa ngesepa nxa sekusiya ekulaleni ugezwa ngezihlahla eziyabe zihlonywe kuye emini yonke. Nxa lezizihlahla ezicoleke kangaka zingeniswe kudade leso senzo yikuvunula noma ukugqokisa udade.
Ngemvelo kadade kubalokutshelela okuthize okumunyathwa yizihlahla lezi eziyabe zivunuliwe. Angamumatha izihlahla lezi kuba lokukholisa okuthize izithandani nxa zisembathana kwenza udade ahlale emutsha, yiwo umumo opheleleyo njalo uthande kakhulu kubomama abahloniphekayo ngalokhu kuvunula, uzayithola imbali yokuvunula, akukhathalekile ukuthi wena ungaze uthi wena ugezile kodwa uxegisile ekugezeni kwakho ngokungavunuli. Bakhona abantu balahlekelwa yimizi yabo ngenxa yokuswela imvunulo. Lokhu-ke yikho okwakungumuzi wakho kudala. Pho-ke lamhlanje sekuthiwa ukuvunula lokhu sokubangela imvukuzane (cervix cancer).
Online Reporter