adminUmkami katshayi uyabulala, sengifuna ukumtshiya
NGIDIDEKILE kangazi lokuthi ngithini Khulu. Ngingumama oleminyaka yokuzalwa engu-31 sengileminyaka engu-12 ngithandana lomkami. Umkami uleminyaka yokuzalwa engu-36 njalo uleminyaka engu-7 engithethe.
Uhlupho engilalo Khulu yikuthi umkami katshayi uyabulala, sesiside isikhathi ngibekezela ngisithi mhlawumbe uzatshintsha kodwa kuyaphambili. Khulu kalandaba futhi kwezinye izikhathi ungitshaya phambi kwabantu loba phambi kwezihlobo zakhe kanye labantwana. Khulu ngifuna ukukutshela iqiniso uthando kangiselalo ngitsho.
Lokhu sokungenze ngaze ngakhomba njalo ijaha lakhona selifuna ukuyavela kanye lokutshada lami. Ijaha engithandana lalo kangilitshelanga ukuthi ngendile. Ngenzeni Khulu ngeluleka?
Impendulo
Kunzima mzukulu ukuhlala lomuntu okuhlukuluzayo emzimbeni kulezinsuku. Kukanti kudala onyoko babesithi nxa bengatshaywa ngomkabo kabathandwa. Umhlaba usuguqukile mpela lokhu yikho okubizwa ngokuthi yi-domestic violence. Okokuqala usuke wahlala laye yini phansi umkakho wambuza ukuthi kungani ehlala ekutshaya njalo kakumyangisi yini ukukutshaya phambi kwabantu. Nxa usuke wakwenza lokhu okwesibili ongakwenza yikuyabikela abangakibo kanye labangakini ngempilo oyiphilayo. Nxa lokhu kungehlula mzukulu uyabe usukhululekile ukuthi uye emapholiseni uyembophisa ngoba umthetho kawukuvumi ukuthi akutshaye.
Umkakho uyakwazi yini ukuthi nxa ekutshaya abantwana bekhangele labo bayahlukuluzeka emoyeni okucina kubenza bangakhululeki. Mzukulu ngiyazi ukuthi isenzo somkakho sephula umoya yikho nje usithi wena kawusamthandi kodwa angithi wawuzwe abanye omama besithi bahlalele abantwana yikho kanye okumele ukwenze. Bekezela mzukulu wami njalo ungadinwa ukutshaya phansi ngedolo ubikele uMdali wakho ngesimo okuso.
Umkami usefuna umntwana owesithathu
Khulu ngilabantwana ababili abangamankazana kodwa umkami usefuna owesithathu uthi sizame umfana mina kangikamfuni ngoba umkami kakaze ayevela kwabakithi. Sengizamile ukuthi ngithi kaye khipha loba ngukangaziwe nje kodwa uthi uzahamba engathola imali. Khulu kambe imali yake yatholakala inengi ngasikhathi sinye kumbe le ekhona iyahanjiswa kubuyelwe futhi kuyekhitshwa enye. Mina engikufunayo yikuthi abangakithi bamazi okusemthethweni umuntu engihlezi laye. Kambe ngingabe ngiphambanisa yini Khulu?
Impendulo
Mzukulu ngiyakuzwa okutshoyo kodwa wena lomkakho, vele akumelanga ngithi ngumkakho ngoba ubudlelwano benu bubizwa kuthiwa ngumasihlalisane. Mzukulu laphambanisa ekuqaleni ngokuhlala lonke abadala bengakwazi. Ngiyathaba kodwa ngoba usufuna ukukuqondisa kodwa kumele uphathiswe kulokhu. Yana kwesinye isihlobo somkakho uyesichazela ngesifiso sakho ukuze akhulume lomkakho. Limqotho sibili ukuthi imali kayitholakali iyisigaqa kodwa le ekhona ingaphathisa kakhulu ukuthi umkakho ayevela ngakini aziwe.
Kulezinsuku imikhuba lamasiko sekuxubana kungakho kuzakubabuhlungu mhla kusenzakala ingozi mhlawumbe udlule kulumhlaba umkakho abesethwala luklubhu abakini sebesithi abamazi kumele abhadale. Bayabe bengaphambanisi futhi ngokutsho njalo ngoba kabamazi okusemthethweni bazi nje ukuthi umntanabo uhlezi lendoda. Mzukulu zama ukwenza lelicebo mhlawumbe omunye wakho angakuzwisisa acine esiya ngakini lawe ubusuzamdingela indlalifa ukhululekile emoyeni.
Umkami uthi ngimubi
Ngithemba uphilile Khulu ngicela ungincede. Umkami uthi ngimubi kakhulu kungakho kafuni ukuhlangana lami emacansini, sihlangana nxa edakiwe kuphela.
Impendulo
Mzukulu ngiyadana kakhulu ukuthi umkakho ukuhlukuluza ngale indlela. Mana ngikutshele akulamuntu omubi ngitsho loyedwa emhlabeni ngoba sonke sadalwa ngomfanekiso kaNkulunkulu. Umuntu omubi ngolenhliziyo embi. Mbuze umkakho ukuthi nxa wakubona umubi kungani wakukhombisa uzwe kumbe uzakupha impendulo elomsoco.
Online Reporter