admin
Khulu
Umkami uyachama engutsheni
KHULU: Ngingudade ole-26 ngitshade lababa ole 38 olesithunzi njalo lemali enengi. Sibe lewhite wedding ngoMpalakazi odlulileyo esengilobolile. Khulu ubaba ulemali enengi, kodwa inkinga uyachama engutsheni.
Kwesinye isikhathi kuze kube kabili kumbe kathathu ngelanga nje elilodwa, nxa anganatha uvele azitshiye nje engutsheni. Ngenzeni? Ngiyamthanda njalo ungiphethe kahle. Inkinga yileyo eyokuchama lokuzitshiya nxa elele.
Ngididekile.
Impendulo
Into ekhona mzukulu nansi, uphakathi kwenkinga kodwa ephelayo ngale indlela. Ongakwenza mzukulu yikuthi umthengele owakhe umbheda oyi-single bed ubusumtshela ukuthi wenzela ukuthi angcolise lowombheda nxa angazikhohlwa. Wobani lesivumelwano sokuthi umbheda lo omcnane ngowakhe. Into ehluphayo yikuthi uyazithambisela ngenxa yokudakwa. Aluba ukuthambisa lokuzitshiya lokhu ukwenza engadakwanga bengizakulayela umuthi ozaqinisa isinye kanye lethumbu lakhe ukuze enelise ukuminya nxa esephatheke kubi. Okwakhathesi akalale yedwa nxa edlile. Uzaze azikhuze. Ikakhulukazi umuntu onje engadakwa ucina engasazazi. Yikho angafika esedlile umdonsele embhedeni wakhe ayekwenza into zakhe yedwa, uzaze azikhuze.
Umkami kakhuli
Khulu: Ngicela ukwazi ukuthi umuntu ongubaba oleminyaka engu-35 labantwana ababili ulakho ukutshintsha indlela aziphatha ngayo na kumbe lokho ayikho khona sekhulile ngoba ubaba wengane akakhuli engqondweni, kaboniseki, kanikwa mbono, wenza umathanda. Nxa ngitshela abangakibo bathi uzakhula. Mina sengikhathele, ngihlalele ingane zami nje. Angazi Khulu kambe uzatshintsha lumuntu, umbono wakho ungangisiza. Ngiyabonga.
Impendulo
Umuntu onjalo uyatshintsha mzukulu ngenxa yezehlakalo ezithize ezingamvelela ngokukhuluma langokutshelwa ngabantu, bemfundisa ukuthi kuyayangisa lokho akwenzayo. Into ezihluphayo emuntwini onje yikuhamba labangane abadla indlabeyiyakaza. Athi angafika ebantwnini abone ingathi usehlakaniphile, into enje mzukulu wami yiyo kanye lindaba ethandwa ngumthetho ukuthi umendo wababili kawumelwe ngumuntu phakathi okuthiwa ngusodombo.
Umendo wababili kumele ube lomhambeli phakathi kwawo. Lokhu kwenzelwa ukuthi nxa izinto sezibheda indaba yokwethulwa ezihlotsheni zendoda ngusodombo beselihlaliswa phansi izihlobo zendoda zizabe zikhala zithontisa inyembezi zokuyangeka abesekhuzeka. Kungenani ntombi kababa emhlabeni abantu bakhona. Dinga umuntu ohloniphekayo omdala umtshele yonke into ephakathi komuzi wenu ahambe ayomkhuza. Phangisa ngale indaba yokuthi akhuzwe ngabadala engakonakali. Uthi kabamtshele ukuthi yisiqalelo sokuqoqoda indlu yamagugu aphelela emhlabathini. Bambuze ukuthi kungehla into enjalo mina labantwana uzasala lobani.
NgiHIV+, ngifuna umntwana
KHULU: Linjani? Ngingumama oleminyaka engu-26. Ngilomntwana oyedwa. Mina lomkami siphila legcikwane leHIV.
Ngileminyaka emithathu ngendile manje sesifuna umntwana. Senzenjani Khulu.
Impendulo
Indaba yile mzukulu, zama ukubonana lababona ngokucindezelwa kwegcikwane leli eliphila lalo ubusubabikela ukuthi selifuna ingane ukuze balicebise ngendlela zokuvikela umntanenu kugcikwane leli. Ngiyakholwa ukuthi uyazi ukuthi abantu ababili abaphila legcikwane leHIV balakho ukuthi babe lomntwana ongelalo igcikwane kungakho ngiyathaba ngoba usubuzile. Yikho-ke ngisithi ungathandabuzi ukuyafika ekilinika eseduzane lawe ubabikele ngesinqumo senu lesi ukuze balicebise. Kungaba kuhle kakhulu futhi nxa lingahamba lonke lomkakho ukuze liyecebiswa lindawonye ukuze lindaba liyisebenze liyiqede libabili.
Online Reporter