admin
Ethel Ncube
KULENINA lelokitshini leMagwegwe North koBulawayo elisendebeni zezakhamizi nanko phela lihamba lihlola amantombazana akulelilokitshi lithi lidinga ukwazi ukuthi asesezintombi ezigcweleyo ngokuhloma isandla sayo kunye lophini ezithweni zawo zangasese.
Isindabaphenduli le yenzakale ngoMvulo kuyonale iviki lapho uNkosikazi Noleen Mlalazi (akusi gama leqiniso) ebuthanise amantombazana angu-5 asakhulayo akumfundo yaphansi wawahlola ukuthi asesezintombi nto ngokufaka isandla ezithweni zawo zangasese andubana abhode lawo kulelolokitshi ewatshaya njalo etshela abantu ukuthi ujezisa amakhikhitha.
Lesi siphatho sabantwana size ngemva kokuba indodakazi kaNkkz Mlalazi eleminyaka yokuzalwa engu-15 eyenza uGiredi 6 iqede amalanga amahlanu ingalali ngekhaya.
Kubikwa indodakazi kaMlalazi isibuyile wadingisisa ukuthi iganga labobani okuyikho okwenza wachaza abangane bakhe abane abayibo abasebehlukuluzwa nguMlalazi.
Iphephandaba likazulu lixhumane lomunye umzali olomntwana owahlukuluzwa linina leli okutholakale ukuthi nguNkosazana Dube nje kuphela othe ukhathazekile ngokuhlukuluzwa okwenziwa umntanakhe nguNkkz Mlalazi.
“Mina ngilokudana kakhulu ngokuhlukuluzwa kwabantwabethu thina singabikelwanga. Ngikhuluma nje kuthange umntanami ubuye esehluleka ukuhlala izibunu zibuhlungu ethi utshaywe nguMlalazi kanye lamapholisa,” kutsho uNkszn Dube.
Uqhubekele phambili echaza ukuthi abantwana bahlokozwa ezithweni zangasese ngophini bafakwa lesandla.
“Le into eyenziwa nguMlalazi ayisiphathi ngitsho laloba emapholiseni sekwehlule. Wathatha abantwana wayabavalela endlini wababhaxabula ngenswazi ethi ‘bangamawule’, abalali ezindlini sebexhwalile. Ngemva kwalokho wangenisa isandla sakhe phakathi kwesitho somntwana okubanga lesikhombisa kumfundo yangaphansi saphelela ethi ufuna ukubona ukuthi uyintombi nto,” kutsho uNkszn Dube.
Ngesikhathi uMthunywa evakatshele kuleyo ndawo ukhulumisane lesinye isakhamuzi uNkosazana Nellie Moyo owabona abantwana beqedwa ukuhlolwa betshengiswa uzulu.
“Mina ngabona uzhizhi lwabantwana selugcwele emgwaqweni kuthiwa ngamabele endlela bephahliwe ngomama abangasibazali babo bebatshaya ngenswazi kuthiwa sebezithwele, kabakhame amabele phambi kukazulu okuyinto elihlazo emphakathini. “Abantwabethu athi balala lamadoda ubathole endlini yakhe belele lawo yini? Emapholiseni ubahambiseleni bona bengelacala kungowakhe umntwana osesazi amadoda,” kubika uNkszn Moyo.
Intatheli ibuye yakhulumisana lomunye oziveze ngokuthi nguKhumalo ochaze ukuthi okwenziwayo ebantwaneni kuyabaphazamisa impilo zabo.
“Batshaywa baze babongolela abantwana ngemva kokuhlolwa ubuntombi babo thina abazali sikhona sisithi avule umnyango uMlalazi esala ethi abazukulu sebengamagabha, akusela zintombi.
“Ebabhula wenze njalo owakhe umntwana ubeselamalanga amahlanu engekho endlini kodwa abethu silala labo ezindlini nsuku zonke. Mina ngitshona ngikhangele kungena abafana abakhulileyo bevalelana lomntakaMlalazi. Into le ayingiphathi ikakhulu lokutshaywa kwabo ngamapholisa thina singakwazi,” kutsho uKhumalo ongumakhelwane.
Uqhubekele phambili wathi indaba le siyehlule abomthetho ngoba bathi isiphelile kodwa bona abasuthiseki ngokuhlukuluzwa kwabantwana.
Ekhuluma lentatheli uNkkz Mlalazi uveze ukuthi amantombazana eMagwegwe North semehlule ngokuba ngamabele endlela.
“Sebegangile benza indlu yami indawo yokwenzela ucansi, yikho ngibahambise emapholiseni ukuthi bayejeziswa. Isiwowowo sonke lesi esikhulunywayo angazi ukuthi sivela ngaphi. Emapholiseni sesilungisile kwedlula. Bebelala labafana ngingekho kutshintshwaniswana amadoda,” kutsho uNkkz Mlalazi.
Ebuzwa ukuthi wayehlola abantwana esebenzisa isandla kunye lophini uNkkz Mlalazi wale wemba phansi ethi kazange akwenze lokhu.
Online Reporter