admin
Khulu
Ngilesilumo njalo angitholi abantwana
LINJANI. Ngingumama oleminyaka engu-33, ngilesilumo njalo sengileminyaka emibili ngendile, angitholi bantwana njalo angisebenzisi i-family planning. Ngicela uncedo Khulu ngoba umendo uzaphela njalo bengibuza ukuthi ngizamphatha yini owami umntwana?
Impendulo
Ngiyadana mzukulu ngenxa yokugula olakho. Umntwana akaphathwa umkhuhlane wesilumo ungelatshwanga.
Isilumo siyelatshwa, singaphela inzalo ibakhona. isilumo kutsho ukuthi ngumkhuhlane oyabe ulume isibeletho.
Isibeletho yindawo ebumba umntwana emzimbeni wesifazana, ngendlela enjalo ayibumbeki ingane endlini egulayo. Ngingakulayela ongazama ukuselapha ngoba mina angiselaphi ngithinta kuMthunywa ngikulayele.
Unkosikazi wami uthi sefuna ukubuyela kibo
Ngiyindoda eleminyaka engu-29 yokuzalwa. Uhlupho lwami yikuthi unkosikazi wami uthi watshelwa ukuthi ungumthakathi yizihlobo zami kungakho sefuna ukubuyela kibo. Indaba le isingihluphe okwesikhathi eside ngoba lomama ongizalayo laye uphakathi kwendaba le. Ngakhula ngihlupheka, umama nguye owayengigcina ngaze ngaba ngumuntu ongcono. Okuhluphayo yikuthi sengehlulekile ukukhetha phakathi kukamama lomkami ngoba uthi kungani ngingabuzanga umama ngendaba le. Khulu ngibulale umama ngeBP sengimbuzile kumbe ngekele umkami ahambe? Nginceda ngezeluleko Khulu.
Impendulo
Ungabona into isenzakala ayiqali ngawe. Lo umhlaba ngokaJehova lokugcwala kwawo. Umthetho lesiko elilotshiweyo ezinhliziyweni lasekuhambeni kwabantu isilisa lesifazana laba ababili bengathandana sebenyamanye. Bazatshiya abazali babo bahambe bayekwakha umuzi wabo bobabili. Ngemva kwalokho phakathi kwabo kuzazalwa umntwana besekuthiwa ngumuzi. Ukuphathwa kwakho ekukhuleni kwakho kwakwenza wathi bayakuthanda abakwenu kanti uphethwe njengesigqili.
Umkakho ukukhipha ebugqilini bakwenu. Phumani lonkosikazi wakho liyekwakha umuzi wenu lodwa kodwa lingabazondi abakwenu njalo umama wakho ufunzwa yizihlobo zisithi umkakho ngumthakathi. Ungavele nje uphume ube lomuzi wakho, umuntu wakuqala ozazehlala lawe ngumama wakho akasoze avele abulawe yiBP, okumgulisayo yikuthi izihlobo zithi umntanakhe uthethe umthakathi. Phuma uphele lesithandwa sakho kuzaphela konke lokhu.
Unkosikazi wami uthanda ukuvakatshela ngakibo maviki onke
Sengihlale lalo umama iminyaka engu-6. Mina eqinisweni bengimthanda kodwa uthando seluze lwaphela ngenxa yezenzo zakhe. Uhlala efuna ukuvakatshela ngakibo maviki onke. Kwesinye isikhathi nxa ngimthinta uthi uzilile ucansi inyanga yonke, noma engatshongo ungihlaba ngendololwane wayawaya nxa kungayisikho lokho ethi ukhathele ulobuthongo. Ethi enjalo akahloniphi uyadelela uvele akhulume lami angathi ukhuluma lokungumfanyana nje.
Inkinga nansi, angisamfuni lumfazi mina kodwa ngathi kukhona into angenza yona ngoba nxa kumele ngimtshele lokho ngivele ngiqhuqhe ngitshaywe luvalo. Noma sengizitshele ukuthi uzathi ephenduka kibo angithole ngithethe okwami ngahamba akwenzeki ngibalisa aze afike. Ukhona yini Khulu ongangihlanzisa noma ongangigezisa?
Impendulo
Into yokuqala embi lukholo lomkhuba wakhe wokuya enhlane njalo imvamo yenhlane ijahwa ebusuku.
Akulalungelo lokuthi unkosikazi womuntu aye enhlane ebusuku abuye sesithi uzilile. Abantu benhlane abalunganga emfazini ohamba atshiye indoda yodwa. Ubuza emuntwini oqondileyo. Iqiniso yikuthi indololwane isetshenziswa ngabafana besidla betshaya inja. Icebo eliyilo yileli. Mlandele nxa esiya kibo funa akayi kibo, uyabe esiya emuntwini yena lo omyengayo enhlane.
Lindaba oyikhulumayo lalokhu engikutshela khona kuyayangisa ukuqatsha umfanyana ozamlonda, amlandele okwensuku ezithize esithi uya kibo. Akungeke kuphele nsuku ngaki ipholisa leli lingayibambanga lindaba. Lokhu kuzakuphathisa njalo ukuthi umxotshe ulesizatho hatshi ukumane ukhulume ungelaso isizatho esibambekayo. Lapha kusegcekeni ukuthi umama lo ufuna nje ukukusebenzisa.
Online Reporter