admin
Uzangithatha yini?
KHULU ngicela ungicebise. Sengithandane lejaha lami okweminyaka emihlanu kodwa kalikaze likhulume ngokungithatha. Ngileminyaka engu-30 yokuzalwa njalo abangakithi sebengibuza ukuthi ijaha lami lingabe lingithanda kumbe lidlala ngesikhathi sami. Ngenzeni Khulu ngoba abangane bami bonke sebenda kusele mina ngedwa. Labomakhelwane bayangihleka. Ngimtshiye kumbe ngimtshele ukuthi akwenzayo kuyangikhuba inhliziyo. Nceda khulu.
Impendulo
Into enhle yikuthi libuzane ukuze lawe uhlale usazi, ngoba kungenzeka ukuba wena ukhudumezela abanye imbiza nje. Kuhle ukuba uhlale laye phansi lizame ukubonisana ngekusasa yenu njalo laye umuphe ithuba lokuba akwazise ukuba ucabangani ngekusasa yenu.Into embi yikuba amantombazana amanengi afuna ukuhlala nje, abesesithi owesilisa nguye ozakhuluma ngomtshado kumbe ngomendo.Akunjalo umendo kumbe ukuthathana yikwakha umuzi wenu lonke, kungakho-ke kungumlandu wenu lobabili ukuba lixoxe ngawo njalo litsho ukuba ikusasa yenu lifisa ibenjani selilonke njengemuli. Akukuhlanga ukuba wena uphenduke ube ngumbukeli ulindele ukuba ujaha uzakwenza isinqumo yedwa. Amajaha amanengi athi angaphiwa igwayi akhohlwe yikulungisa ngomtshado ngoba konke akufunayo ayabe ekuthola njalo ngesikhathi asifunayo. Kuhle uphumele egcekeni lilungise lokhu, kuzakuthi nxa esithi kenelisi ukukuthatha, ube usukhangela ukuba ungatshiyana laye ngoba ungaze ugugele endleleni ungakakhi umuzi wakho. Kodwa okokuthi uzibani wendile, njalo wenza lokhu, lalokhu, akusikwakho, wena isikhathi sakho siyeza, linda wenze izinto kuhle.Yonke into empilweni ilesikhathi sayo, lesakho siyeza, bekezela ulungiselele.
Online Reporter