Online Reporter
Nkosilathi Sibanda
KUDABA olusegudwini enkundleni zokuxhumana, kulenina elidabuka kuleli labantwabalo ababili abatholakale bebulewe endlini yabo eGreat Denham, eBedfordshire, e-United Kingdom.
Amapholisa akulelo asebike ukuba aseqalise uphenyo lwecala lokubulala. Kucatshangelwa ukuba abathathu laba bangabe babulawa kunsuku ezine ezedluleyo. Abedlule emhlabeni laba kubikwa nguNothabo Zandile Khumalo labantwabakhe ababili, abaleminyaka engu-15 loleminyaka emihlanu yokuzalwa.
Amapholisa e-UK athe umsolwa kunakanelwa ukuthi usebalekile e-Britain. Lanxa amapholisa engakamethuli ngebizo ngokusemthethweni, amakhasi amanengi kunkundla zokuxhumana ebulenjini aveze ubufakazi bokuthi umsolwa nguNdodana Mkhanyisi Tshuma,owaziwa njalo ngelokithi Mark, umyeni kamufi.
Eminye imbiko etholwe yintatheli kodwa engakaqinisekiswa iveza ukuba uTshuma utholakale efile.
Kubikwa ukuthi amapholisa afika emzini lo ngoMvulo ngemva kokukhathazeka kwabomakhelwane, abasebelensuku bengaboni amalunga emuli le.
Endlini amapholisa afica izidumbu ezintathu; esikamama labantwabakhe ababili.
Umsekeli kamkhokheli wamapholisa eBedfordshire, uJohn Murphy, uthe lesi yisehlakalo esibuhlungu kakhulu.
“Leli licala elidanisayo lapho okutholakale umama labantwabakhe ababili bebulewe. Uphenyo lwethu luveza ukuthi umsolwa angabe esephumile elizweni. Siqhubeka sisebenzisana lezinye inhlanganiso ukuze abanjwe abuyiselwe eBritain,” kutsho uMurphy.
Uthe lanxa kungelabufakazi obugcweleyo, amapholisa azabhoda ngamandla endaweni zonke ukuze kube lokuhlaliseka phakathi kwezakhamizi.
Omakhelwane bathe umdeni lo wawuthule njalo wawuhlezi kuhle labanye.
Kubikwa imuli le yasuka eZimbabwe yayahlala eBritain eminyakeni emibili edluleyo, bathenga indlu yabo eCarnoustie Drive, indawo eyaziwa ngokuhlala abantu abacebileyo.
Omunye umakhelwane, uVicky, uthe umdeni lo wawukhanya ucebile njalo ulobuntu.
Ngokutsho kwembiko kumakhasi eSocial Media, kuthiwa ngoLwesibili kusihlwa, abangane lezihlobo bafika endlini benza isikhumbuzo. Omunye owesifazane, ekhala, uthe uNothabo wayengumama olothando njalo owayehlonitshwa ngabantu.
Amapholisa anxuse loba ngubani ololwazi kumbe owabona okungajwayelekanga kuCarnoustie Drive ngoLwesihlanu loba ngoMgqibelo ukuthi abikele amapholisa ukuze kuncedise kuphenyo lolu. Ukubulawa kukamama labantwabakhe sekutshiye umphakathi weGreat Denham wethukile, njalo udaba lolu seluphenduke lwaba yindaba esegudwini kumaphephandaba atshiyeneyo e-United Kingdom.
