adminCornelius Luphahla
KULENINA lelokitshini leCowdray Park koBulawayo elitshiye izakhamizi zithithibele ngemva kokugqekeza komakhelwane walo abaloja bonke qede latshontsha impahla.
Isehlakalo lesi senzakale ngoLwesithathu kuviki ephelileyo lapho uNkosazana Beauty Bhebhe asike isivalo sikaNkosazana Cynthia Moyo abaloja bonke endlini elekheli elithi 11280 watshontsha i-laptop, umakhalekhukhwini, impuphu, kanye lezinye impahla qede watshaya utshani.
UMthunywa uvakatshele kule indawo wakhulumisana loMnumzana Freddy Ncube oveze ukuba okwenza bathi uMaBhebhe nguye otshontshe impahla zikaMaMoyo yikuthi ngemva kokucatsha kwempahla wabiza umngane wakhe ethi lipholisa.
“UMaBhebhe okwenza sithi nguye otshontshe impahla zikaMaMoyo yikuthi kwathi ngemva kokutshontshwa yena wathi sebiza amapholisa wasefonela umngane wakhe owafika wazenza ipholisa sathi sesimbuza ukuthi usebenzela ngaphi wabaleka.
“Lokhu kwadala ukuthi sibone ukuthi ubezama ukuvala ubusela bakhe esazi ukuba umuntu lo kasoze enze lutho olucacayo. Ngemva kwalokho ipholisa lakhe leli lisuke layalala laye komakhelwane,” kulandisa uMnu
UNkszn Moyo ubikele intatheli ukuthi impahla zakhe zitshontshwe esemsebenzini njalo okwenza athi linina leli elizitshontshileyo yikuthi lihlala lithi uzatshontshelwa.
“Impahla zami zitshontshwe ngesikhathi ngingekho ngisemsenzini. Ngithe ngifika ntambama ngathola isivalo sami sisikiwe impahla zami zingasekho. Okwenza ngithi zithethwe nguMaBhebhe yikuthi uhlala engitshela ukuthi ngizatshontshelwa ngisemsebenzini ethi uyaphurofitha.
“Okunye njalo ngithe ngimbuza ukuthi ubengaphi ngesikhathi kutshontshwa wahle wabaleka wayalala komakhelwane wafika wathi udinga umsebenzi.
“Ngokubona kwami ubesezama ukubaleka ngoba kuthiwa ubethi uzimisele ukuhamba ekuseni kakhulu emsebenzini akade sewutholile owokukhangela abantwana. Noma senelisa ukumbona ekuseni kodwa waphinda wabaleka ebusuku lempahla zakhe lakhathesi lokhe singakamboni,” kuphetha uNkszn Moyo.
Ebuzwa ngale indaba uNkszn Bhebhe uthe kayisuye otshontshileyo kodwa okwenze wabaleka yikuthi ubesesesaba ukuthi bazamtshaya bethi lisela kodwa uzazibhadala impahla lezi.
“Mina kayisimi engitshontshe impahla zikaMaMoyo njalo okwenze ngabaleka ngayalala komakhelwane yikuthi kade befuna ukungitshaya bethi ngilisela. Ipholisa engilibizileyo lalo lize labaleka ngoba bebefuna ukulitshaya kungakho lanxa mina ngingazi lutho kodwa ngizazibhadala impahla zabo njengoba bethi zithethwe yimi,” kuchaza uNkszn Bhebhe.
Online Reporter