admin
Thokozile Mbedzi
IZAKHAMIZI zeMashavire eBeitbridge, zisele zitshwaqe imizimba kulandela ukuzwa usane lukhala phakathi kwebhokisi akade liphakathi kwezibi ebezitshiswa andubana balukhiphe ebhokisini solutshile.
Linsindabaphenduli yenzakale ngempelaviki ekuseni ngehola lika 6.
Kucatshangelwa ukuba usane lolu obelukhanya lusanda kuzalwa lungabe lufakwe ebhokisini ngunina ngenhloso yokulubulala. Abantu bacabangela njalo ukuthi unina wosane angabe enguye otshiye elumathise umlilo kulindawo ebigcwele izibi efuna lufe.
Kubikwa usane lolu luzwiwe ngomunye obezidlulela kule indawo lukhala wasesondela ukuze abonisise wathola usane lufakwe phakathi kwebhokisi njalo solutshe emhlane.
Intatheli ixhumane lesinye isakhamuzi sakulindawo ecingweni uNkosazana Rose Moyo oveze ukukhathazeka ngesenzo sowesifazana ongabe elahle usane.
“Sizwe abantu sebehlaba umkhosi bebabaza ukuthi kutholakale usane luphoselwe ezibini lufakwe phakathi kwebhokisi njalo usane lolu beseluvele solutshile emhlane.
“Asazi ukuthi unina womntwana ubengenwe yini aze alahle umntwana amzeleyo khona kulabantu abafuna abantwana phakathi kwethu. Aluba uluthethe usane lolu walusa lapho okugcinwa khona abantwana,” kutsho uNkszn Moyo.
Isikhulumi samapholisa esabelweni seMatabeleland South uChief Inspetor Philisani Ndebele ebuzwa ngodaba lolu uthe bachwayisisa ngendaba yosane olutholakale luphakathi kwebhokisi lusendaweni elahlelwa izibi solusitsha.
“Samukele umbiko wosane olutholakale endaweni okulahlelwa izibi lusitsha. Usane okwakhathesi lusesibhedlela. Sicela uzulu ongabe elolwazi lwenina elingabe lenze icala leli ukuthi abikele amapholisa aseduzane laye ukuze libanjwe,” kuphetha uChief lnsp Ndebele.
Online Reporter