admin
Ethel Ncube
NGENXA yomumo wezomkhonomi kuleli osuphinde wengezelelwa yikuza kwe-Covid-19 abadlali abanengi kugoqela imbongi sebedinga ezinye indlela zokuziphilisa nanko phela umsebenzi wabo umiswe yikuza kwalumkhuhlane ogenqule phose zonke inhlangothi elizweni kanye lasemhlabeni jikelele.
UMnumzana Lerato Nqindi Ndlovu odumileyo emajahundeni laye kukhanya ukubone kumqoka ukuthi asukumele phezulu adinge ezinye indlela zokuziphilisa ngenxa yobhubhane lwe-Covid 19.
Ekhuluma lentatheli uNqindi uveze ukuba lokhe kwaqala ukuvinjwa kwabantu emakhaya impilo yahle yaqala ukuntshintsha:
“Lokhe kwaqhamuka umkhuhlane lo impilo yahle yabanzima. Mina ngiyimbongi ngiphila ngokuhaya inkondlo lapho engiyabe ngibizwe ngabantu embuthanweni etshiyeneyo. “Khathesi akusekho lokho njengoba abantu bengasavunyelwa ukuthi babuthane kungakho sengiphila ngokwemba igolide.
“Lami ngiyaphanda njengabanye ukuze abantwana bathole ukudla ngoba ngingahlala akulalutho olubuyayo njengoba umsebenzi wami wokuhaya uvaliwe. Okuncane engikutholayo ekugebheni kuyangingiphilisa,” kubika uNqindi
Uqhubekele phambili waveza ukuba ukuya ekwembeni igolide akutsho ukuthi usetshiyile umsebenzi wakhe.
‘’Kubalandeli bami ngithanda ukuthi ngilazise ukuthi lokhe ngihaya kungadlula konke lokhu izinto ezinengi zingavulwa lembuthano isivunyelwa lizangibona ngiyabuya sengilokutsha engiliphekele khona ngesikhathi ngihlezi ngekhaya.
“Okokwemba ngikwenzela ukuba lami ngithole okokuziphilisa ngingahlaleli izandla ngoba umangoye engalala eziko ngingekela ukuphandela imuli yami.
“Impilo yokugebha ayimnandi njalo inzima ikakhulu nxa ungejwayelanga ukuhlala egangeni kodwa njengendoda uyaqinisela njalo nginanzelela ukuba ezinye inkondlo zami zizavela kulo umsebenzi engiwenzayo,’’ kuphetha uNqindi.
Online Reporter