YiNtatheli kaMthunywa
KULESELA lentambo zamagetsi elitshiswe ngamagetsi lafa lizama ukutshontsha intambo zeZimbabwe Electricity Supply Authority (ZESA) eCowdray Park, koBulawayo ngoLwesithathu ekuseni.
Izakhamizi zalelokitshi zithe zivuka zahlangabezwa yisehlakalo esesabekayo somzimba wendoda okucatshangelwa ukuthi ibileminyaka engaba ngu-30, etshiswe ngamagetsi, ilele phandle kwendlu yesinye isakhamuzi.
Kucatshangelwa ukuthi indoda le itshaywe ngamagetsi ngesikhathi izama ukutshontsha intambo lezi ku-transformer eseduze kwenye indlu.
Ngesikhathi intatheli zifika endaweni yesiga, bathole amapholisa eZimbabwe Republic Police (ZRP) esethatha isidumbu.
Amapholisa akoBulawayo kawakavezi ibizo lendoda le.
Izakhamizi ezikhulume lentatheli zithe ukutshontshwa kwentambo zamagetsi kanye lamafutha ama-transformer sekuyinsakavukela eCowdray Park.
“Phose maviki wonke, ingxenye yeCowdray Park iyabe ingelamagetsi isemnyameni ngoba amasela ayabe esetshontshe intambo kumbe amafutha kuma-transformer. Sesidiniwe yizigebenga lezi ezifuna ukuziphilisa ngokuphazamisa impilo zethu,” kutsho uNkosikazi Londi Ngwenya.
“Ngiphila ngokuthengisa inyama yenkukhu, ngakho ngidinga ukuthi kuhlale kulamagetsi ukuze ibhizimusi yami iqhubeke. Kodwa amasela entambo zamagetsi enza impilo zethu zibe nzima.
“Kangithabeli ukufa komunye umuntu, kodwa bekumele azazi ingozi zokuzama ukutshontsha intambo zamagetsi,” kutsho uMnu Givemore Murara.
