admin
Ethel Ncube
ZILOKHU zimadolonzima izakhamizi zeLupane ngemva kokubonakala kwenja ithwele ikhanda lengalo yomuntu, uMthunywa uyakuveza lokhu lamhlanje.
Isiga lesi senzakale ngeviki ephelileyo kuma-New Stands khonale eLupane lapho abantu abathe behlezi babona inja ithutsha isisitheka lekhanda kanye lengalo yomntwana.
Intatheli ixhumane loMnumzana Benon Ndlovu ovumileyo ukuthi inja ithutshe iphethe ikhanda lesandla sosane.
“Asazi ukuthi nguphi owesifazana obe lesibindi sokucitsha umntwana ongowakhe. Inja le ibonakale kuma-New Stands eLupane njalo abantu bahle baqamba omunye untombazana okucatshangelwa ukuba nguye ongabe enze lokhu.
“Untombazana lo kukhanya ubezithwele esebenza ezitolo kodwa isisu sangasabonakali njalo lomntwana kabonakali yikho beze babikela amapholisa,” uMnu Ndlovu.
Uqhubekele phambili echaza ukuba lesi yisihluku esikhulu.
Ekhuluma lentatheli omunye wabosomabhizimusi beLupane ongathandanga ukuqanjwa igama lakhe uveze ukuthi kuliqiniso ukuthi kubonakale inja ilekhanda kanye lesandla somntwana.
“Okukhulunywayo liqiniso ukuthi kubonakale inja ithwele ikhanda lengalo yomntwana, asazi ukuthi ngubani ongabe wakhipha isisu.
“Kulontombazana osebenza ezitolo esimcine ezithwele kodwa isisu kaselaso njalo kalamntwana, ukuthi waswela kumbe wabeletha wayalahla umntwana nguye okwaziyo. Usezandleni zamapholisa,” kuveza usomabhizimusi lo.
UMthunywa uxhumane lesikhulumi samapholisa eMatabeleland North uInspector Siphiwe Makonese ovumileyo ukuba udaba olunjalo lufikile ezandleni zamapholisa.
“Udaba lokuba kubonakale inja ithwele umntwana lufikile endlebeni zethu kodwa akukabanjwa muntu owenze lelicala njalo isidumbu sisemotsha yesibhedlela seSt Luke’s.
“Sicela ongabe elolwazi lokuthi ngubani ongabe ekhuphe isisu kumbe abambone ezithwele kodwa engelamntwana azise amapholisa aseduze laye kumbe babhale incwadi baziphosele kuma-suggestion box,” kuphetha uChief Insp Makonese.
Online Reporter