adminkuloba uPathisa Nyathi
Lwafika usuku. zabakhafula kusukela ekuseni kwakhombisa ukuthi abanye babesuke kuseluvilibana. Zabakhafula laze laqala ukubhadla. Sazafika thina kungasabizwa ozwayo. Kwakungasimuntu sekuyinyelane eyabonwa ngamaNdebele wona acabanga ukuthi abafo beza beyisicakafana nje kanti kababuzanga elangeni. Kweza inyelane hatshi eyayizegebha igojana elilodwa kuzedingwa wona umkute wodumo lowo.
Zanyathelana izimota ezazizeletha abaphathekayo kulo umsebenzi. Ezinye ngezabanye nje ababenxusiwe kunye labathathwa ludumo ngoba lwafika kude njengezulu lesiqhotho. Phakathi zazingasaneli yikho zabhaca ngaphansi kwezihlahla ezingaphandle okufana lenkamamasane, isithundu, umbondo lezinye. Pho zonke lezi zasezakhalala amahlamvu azo ngoba bekuyisikhathi somqando lapho izihlahla eziphumula khona. Zona ukuphumula kwazo yikukhalala abantwabazo, amahlamvu phela.
Abanye ngababesuka eduzane abazizela bhadubhadu bazakuthi fuqala eMagugu. Umsindo omnandi phothololo.
Phela lonyaka kwaba ngumnyaka wakuqala ukuthi kuze lokhu okuthiwa yi-PA. Ilizwi lokhulumayo laliqonga ligwaze izimbalu kunye lezintaba. Umsindo wawuzwakala umuntu esesekhatshana le. Uzakuthi esethi fuqaqa umuntu ahlangabezwe zifuleki zenkampani eyenza isamende, iPPC. Lokhu kwenza indawo yabukeka amagama. Phela inkampani le yayingenye yezaziphathisile lapha ngokunikeza imiklomelo kulabo omama abakhenceza phambili emncintiswaneni wokucomba izindlu.
Iwadi engumanqoba yaphiwa leso isamemde ukuthi siyephathisa ekwakhiweni kwesikolo abasikhethileyo ewadini.
Kwathi sekuveziwe abanqobi iwadi eyanqobayo kwaba nguwadi 24 lapho okuqoqa khona indoda yakoZulu.
Laphakathi kwakuphephezela sengathi kusensimini yomlimi ophumelelayo olekhaba elithi nxa umoya uvuthela imikhwane isabele ngokuphephezela. Zaziphephezela ifuleki zako-Ekhaya abanikeza ibhayisikili, ezako-Arenel abanikeza amabhisikiti kunye leziwiji. Ngitsho loKango akazange athande ukusalela emuva, ngoba esalela muva bathi ibanjwa yizinja. LeHalsted layo kayikuthandanga ukubanjwa yizinja.
Kwaba ngumnyaka wokuqala ukuthi abantu bathi wololo phakathi kwesakhiwo esokucitsha ilanga. Wayesebenzile umfokaDube labafuleli bakhe ngokubamba ngamazinyo kwathi kufika usuku oluqavileyo sebewugqibile umsebenzi. Njengoba mhlalokho lalikhupha umkhovu etsheni asazi ukuthi ayezothini aMahlabezulu aluba lesi isakhiwo sasingekho. Singathi thina lalibhadla siyabe singagabazanga kwanela.
Kanti futhi mzukwana welanga ayethe gwaqa amaqembu amathathu ahlabela imbube. Hatshi umculo wabo wanyikinya inkundla kwasabela amadwala aseduzane. Kwasala abalutshwana abangazi lokulususa unyawo.
Sengisitsho labo abamhlophe ngabona sebesukuma abanye bewususa umgido wakithi. Enye intombi ngabona isikhotheme incintisana lenhlabathi. Umculo wenza umahluko omkhulu.
Nanso-ke laso isethekeli esiqavileyo kasidanisanga. Wayekhona umntakaNdebele uSandra enxuswe ukuzakwethula inkulumo lokunikeza abanqobileyo imiklomelo. Wabakhuthaza omama ngokubalandisela esakwenzayo kwezomculo lanxa ekuqaleni abazali bakhe babengathi kabawuthakazeleli lo umsebenzi ayesezithele emdangweni wawo.
Ngokuya kwesikhathi bakwamukela ayekwenza nango edlondlobala wacina ethenge imota lendlu esabhabha.
Bafunda-ke abanye ukuthi umculo ungaletha imivuzo emihle nxa umhlabeleli esazi ukuthi enzeni ngenzuzo yakhe.
Wayevunule okuginyisa amathe. Kwakhanya kubomama ukuthi ezamasiko lobuciko ziyabhadala. Pho njengoba elawo ama-CD kwahle kwaqhunswa wona awakhe. Hatshi kwasuka uthuli abalunqoba ngokuba belokhu bechela amanzi.
Phela indawo esahlanganela kuyo kayikasindwa ngesamende. Lokhu kukhangelelwe ukwenziwa ngemva komkhosi lo ebesiphakathi kwawo.
Kanti emveni kwakuqale kwenziwa umncintiswano wokuloba ubuso. Wathola omama sebehlezi ngababili bephethe izibhuda zabo zemikhakha eminengi belobana. Bathe sebeqedile babizelwa kwenye indlu lapho okwakuloVoti Thebe lentombi yakoMabhena. Bubili babo basebenza eGallery koBulawayo. Yibo ababengabehluleli. Babebanengi abaphatheke ekulobeni lokhu. Bakhona-ke ababengenele ekucombeni izindlu baphinda bangenela ekulotshweni kobuso. Abanye bahamba sebengabanqobe nhlangothi zombili.
Kwabasobala ukuthi lo umncintiswano usuwenze umahluko obalulekileyo esigabeni seMatobo. Banengi asebeqale ukwenza lokhu esikwenzayo lapha eMatobo. Okuhle kuvele kunjalo, kuyabukwa kuphinde kuthathwe yilabo asebethunjwe izinhliziyo zabo.
Online Reporter