admin
Msilisi Dube
ABALIMI abafuya inkukhu sebekhuthazwe ukuba baqaphele njalo bavikele izifuyo zabo kumkhuhlane osuhlupha kwezinye izigaba obizwa ngokuthi yi-Inflamatory bursal disease wona olakho ukuthanyela izilugu nxa ungenqatshelwanga ikakhulu ngesikhathi somqando.
Kubikwa umkhuhlane lo usubulele inkukhu ezedlula ezingu-5O eBinga.
UDokotela Lovemore Dube uveze ukuba abalimi abanengi balumango sebelahlekelwe zinkukhu zabo ngenxa yokuzihlalisa ezilugwini ezingcolileyo.
“Kulabalimi abalitshumi abavela eManjolo abafelwe zinkukhu zabo ezingu-50 ngenxa yokuthi bebengela lwazi olujulileyo ngokuzifuya.
“Inkukhu lezi kumele zihlale endaweni ehlanzekileyo njalo engekho manzi,†kutsho uDkt Dube.
Umkhuhlane lo ubangelwa ligcikwane elibizwa ngokuthi yi-birnavirus.
“Umkhuhlane lo ubangelwa ngamagcikwane ahlala phakathi kwezilugu zenkukhu. Okwakhathesi umkhuhlane lo kawelapheki kodwa abalimi balakho ukuwuvikela ngokunika izifuyo zabo imithi yama-vaccine.
Izibonakaliso zomkhuhlane lo ziqala ukubonakala nxa inkukhu sezilamaviki amabili kumbe amathathu
“Inkukhu ezihlaselwe ngumkhuhlane lo zibonakala ngokwehluleka ukudla, ukwehluleka ukuhamba lokufa masinyane. Nxa umlimi engananzelela ukuba inkukhu zakhe sezihlaselwe ngumkhuhlane lo kumele atshise ezigulayo ukuze umkhuhlane lo ungamemetheki,†kubika uDkt Dube.
Ngaphandle komkhuhlane lo eminye imikhuhlane eyingozi igoqela iNewcastle, fowl cholera, leminye imikhuhlane etshiyeneyo.
Online Reporter