admin
Siphathokuhle Ngulube
Salibonani bafundi. Siyaqhubeka sikhangela inkulumo elenhlonipho kanye lezenzo ezikhomba inhlonipho ebantwini. Esintwini umuntu ongelanhlonipho ufanana lensimbi nje encencethayo kodwa inganakwa muntu. Umuntu ngumuntu ngendlela aziphatha ngayo kanye langendlela akhuluma ngayo. Izinkulumo zomuntu ongahloniphiyo zikhanya bha. Ubona nje ngokunyukubala kobuso ebantwini ukuthi inkulumo yakho ayihambelani lokukhangelelwe nguzulu.
Ngeviki ephelileyo sikhangele izehlakalo ezithile. Simbonile ugogo ecunulwa yingane engafuni ukumnikeza isihlalo ebhasini ngenxa yesimo ayiso sona.
Ingane le itshengise ukudelela okudlulusileyo. Kuthi kunjalo ugogo laye akenzanga njengomuntu omdala. Uveze isimilo esisuke samlulaza ebantwini abakade bembukele.
Kusehlakalo sesibili impendulo ethi, “Ngiyaxolisa sihlobo———- kungabanjani sivule kancane ifasitela”? Le inkulumo itshengise inhlonipho lokuzehlisa okumangalisayo. Okuyikho okudingekayo empilweni yethu yansuku zonke.
Asikhangeleni isehlakalo esilandelayo:
Lilamalanga lingelamanzi ngakini. Iroli enkulu ezosiza uzulu ngamanzi isifikile. Wena nguwe owokuqala emzileni. Uvukele khona emzileni empondozankomo. Usamile nje kuthutsha izalukazi ezimbili zihamba zizihudula. Eceleni kulabazukulu abathwele izinkonxa ezimbili. Nxa uzibona nje uzwakala unxapha kakhulu, uqeda lapho uyatshibilika kuphume kuwe amazwi athi, “Izalukazi lezi bazijayeza into embi eyokungeniswa emzileni manje lamhla azibuzanga elangeni, ngeke zikubone lokho. Usakhuluma kanjalo ujaha ongemva kwakho uphuma emzileni ayethatha izinkonxa zezalukazi. Uzikhomba emthunzini azithembise ukuthi uzazibiza nxa esekhelele amanzi. Kambe:
(a) Similo bani esivezwa yinkulumo yakho?
(b) Yisiphi isenzo osenzayo esikhomba ukudelela?
(c) Similo bani esivezwa ngujaha ongemva kwakho?
(d) Ukunxaphela abantu abadala kuyinto eqondileyo yini?
(e) Yisiphi isenzo esitshengisa uthando esenziwe ngujaha ongemva kwakho?
Asinanzeleleni indlela esikhuluma ngayo lesenza ngayo bafundi izinsuku zonke. Lezi izinto yizo eziveza ukuthi uyahlonipha kumbe uyadelela emphakathini.
Asibonaneni ngeviki ezayo.
Online Reporter