marble nkomo
MAHLABEZULU abadala emandulo babengasomi nxa besithi izandla ziyagezana kukanti indlovu iyahlatshiswana ngoba phela akekho ongaphumela egcekeni athi uyaphila engadingi usizo lomunye.
UMvelinqangi wasidala saba banengi ndawonye njalo waphinda wasipha ulimi lokuthi sikhulume sizwanane. Lokhu wakwenza ngenhlakanipho ngoba ethanda ukuthi abantu bakhulumisane bazwanane ukuze basizane kalula.
Izandla vele azilingani yikho nje kuqakathekile ukuthi nxa singabantu siphathisane ngoba lawe ungaludinga usizo lalowo ongumyanga. Sungaba lenkomo ezinengi ube lomuzi omkhulu kodwa-ke ungaba lobunzima mhlawumbe sufelwe ungaligebha ulikwanise ingcwaba lokuthi ubeke othandekayo wakho na?
Yebo bathi ikhuba lomunye alilandima kodwa-ke lokhu akutsho ukuthi nxa umakhelwane ecela ukuthi umsize mhlawumbe ngesipanela umncitshe uthi ndoda zibonele ngoba lawe uzamdinga nxa sufuna ukuthi akusize amabele nxa sedliwa lukhula sufuna akuhlakulise.
Kusasa kuyizolo, bakubona kudala okhokho yikho abanye abahlabeleli abakhaliphileyo babona kungcono ukuthi bahlabele amagama axwayisa umphakathi athi “inotho ngamazolo”.
Okungapheliyo kuyahlola yikho nje Mthwakazi omuhle kumele sibone ukuthi siyathanda omakhelwane bethu njalo sibaphathise lapho lalapho abasilela khona empilweni ngoba phela lingakuhlasela isela njengoba nje asebhokile lezi insuku bakwekele omakhelwane likubulalela endlini ngoba wena uhambela phezulu.
Ikhotha eyikhothayo ngakho-ke asibambaneni sibe munye ngoba akulamuntu ongakusukela ekusize wena ungamsizi uthi nxa etshona edakeni umekela uthi ngoba inkinga ayibhekananga lawe.
Kwesinye isikhathi sibona abantwana besehluleka ukuphilisana labomakhelwane kuhle ngoba vele udiwo lufuze imbiza. Loba nje engumzali wakho umbona ukuthi wenza okubi akumelanga umlingisele ngoba engumzali, wena kumele ukhethe eyakho indlela ngoba kusasa okubi okwenza kwabanye kuphenduka kuwe, hatshi komunye umuntu.
Impilo le luhambo olulemiqanso lemehlelo ngakho-ke bazali fundisani abantwana ukuthi empilweni kuyabanjiswana.
Umthwentwe uhlaba usamila okutsho ukuthi umntanakho nxa eligola uyahle umbone esasemncane umkhuze umlimukise ebubini eseselusane ngoba lesaga siyafakaza ukuthi isigogo sigoqwa sisemanzi ngoba phela ungekela ukwenze indiva nje uzakwehlula sekhulile.
Okwenza uBanda loPhiri kuyamenza, ungathi usubona uBanda sexotshwe umsebenzi ukhangele eceleni wena ubona ukuthi umangoye selala eziko. Ikusasa alikhulumi njalo alaziwa, kungenzeka ukuthi lawe
Phiri kuvuke kunguwe uBanda sezulazule waze wadobha, laye akhangele eceleni akwekele.
Sengiyibhuqile indaba yami kusasa kuyizolo, ikhotha eyikhothayo lezandla ziyagezana, sekusele wena ukuthi uyicubungule ubone ukuthi ukhetha yiphi indlela ngoba zimbili njalo zonke zilomvuzo.
Online Reporter