Online Reporter
Ngithemba sonke kumagumbi amane elizweni lakithi sibe lekhefu elimnandi, mina eyami ibe litshukela uqobo lwayo ngoba bengindawonye lezihlobo labangane, sibi somzukulu wami okade eseleminyaka emihlanu eselizweni laseMelika.
Kube kuhle kakhulu, yawa inkomo esibayeni sithakazelela ukuhlangana njengomdeni.
Wonke umuntu ongene ku-2026 engophilileyo ukhangelele ukuthi afeze angazange enelise ukukwenza kumnyaka odluleyo, njalo kukho konke esifuna ukuthi sikwenze njengoba sesingenile kumnyaka omutsha singakhohlwa ukuhlaba phansi ngedolo sicele kuMvelinqangi ukuthi asikhokhelele.
Ngikhumbula omunye umngane wami wayethi nxa umnyaka uqalisa uzwe ethi ufuna ukusebenza gadalala njalo ufuna lokuyekela utshwala kodwa kungensuku ngaki uzambona esephakamisa inqayi kumbe uhlangane laye eqhuba imbuzi. Uthi lapho umbuza ukuthi njengoba ubefunge wagomela ukuthi kaphindi abuthi caphu wayehle ahleke uzwe ethi akulaleki nxa engabunathanga.
Wawuhle uyifunde ivaliwe ukuthi ngeke abekele utshwala. Banengi abantu abathi nxa singene emnyakeni omutsha uthole bemise ukuthi bafuna ukufeza lokhu lalokhuya kodwa bacine bengenzanga lutho ngoba bebuyele kunyawo kumbe ngithi kumzila abayabe kade behamba ngawo nyakenye.
Abanye bakhona baze bacabangele ukuthi bayaloywa kanti cha kuyikuswela ukuzimisela njalo le-financial discipline ngesiLungu. Umuntu azifice ehamba lugege okwenkala.
Ngithemba sonkeni sizahlaba phansi ngedolo sicele kuMvelinqangi ukuthi asincedise kuzinqumo esiyabe sizithethe ukwenzela ukuthi singahlehleli emuva.
Ayixabene.
