Online Reporter
Thina esikhule ensukwini zayizolo, zazithi zivalwa izikolo ungezwa kuthiwa uzakuya dlalela ikhefu edolobheni sasijabula ubemanzi te ngoba uzachinsa ukugada ibhasi, uyebona lezimota ezinengi lamakhiwa amanengi edolobheni.
Ngaphandle kwalokho, ulimi lalo lwalujabula ngoba ususiyakudla inhlobohlobo yezinkwa njalo uphumule lokuya esibholaneni ukuyakukha amanzi ngenqola.
Amantombazana wona ayephumula lokuthwala inkonxa ngoba edolobheni kulempompi zamanzi akhiwa endlini lezambuzi zakhona zikhonapho endlini. Phela emakhaya kudala, endaweni ezinengi zazingekho izambuzi, abantu babezinceda egangeni.
Lezinsuku uzananzelela ukuthi umehluko phakathi kwemizi yemakhaya lezindlu zemadolobheni usumlutshwane, abantu sebesakha inxuluma yemizi bagebhe imigodi, baxhume impompi zokudonsa amanzi besebenzisa amandla elanga abakubiza bethi yi-solar energy ngolimi lwabondlebe zikhanyilanga.
Omabona kude labo, inengi labantu sebelabo emakhaya, babukela loba yini eyayibonwa ngabantu bemadolobheni, sekwanceda labomakhalekhukhwini, balutshwane asebebhala izincwadi, nxa befuna ukuphuthumisa imilayezo bamane nje badobhe omakhalekhukhwini wabo bantinyantinye inkinobho imilayezo ivele ihambe ngokuphazima kweso.
Izinkwa ezazidliwa mzukwana kuthe kwabuya umuntu ovela edolobheni sokuyinto yansukuzonke, inqe ulemali yakho ngoba izimota zemabheka lazo sezihambisa izinkwa ezitolo zemakhaya.
Sekwaphunyulwa ukunathisa itiye ngamaqebelengwani lompholokoqo kumbe ngenkobe, kwezinye izindawo lethala isifinyelela emakhaya okwenza ukuhamba ngezimota kube lula.
Malutshwane amakhaya asemaphandleni alokhu ebizwa kuthiwa kukomnyama ubambile ngenxa kokusalela emuva ngempucuko, izinto sezatshintsha, inengi labantu elihlala emadolobheni selikhalela ukuthi ngabe liyathola indawo zokwakha imizi yabo emakhaya ngoba abalenhlanhla bathola indawo enkulu adandabule inkalakatha yensimu nxa esegebhe umgodi azilimele ngabe yisiphi isilimo asithandayo.
Lezindlu zakhona zilutshwane ezisasindwa ngobulongwe, abanengi sekwakhiwa ngesamende, abanye baze bacecise langamathayili uthi ungangena kuleyondlu ucabange ukuthi mhlawumbe usedolobheni kanti cha usemaphandleni.
Sezajika izinto, isikhiwa esasilandwa ngabantu izolo emadolobheni sesigcwele emaphandleni ngikhumbula omunye umngane wami wayefuna ngimdingele indawo yokwakha umuzi emaphandleni ngoba ethi impilo yedolobheni isimthwalise amagabha avuzayo ngoba engelayo indlu ebiza yena, wayeloja, nxa inyanga iphelile wayedlala umacatshelana lomasitanda wakhe umnikazi wendlu esefuna imali yerenti kwesinye isikhathi aze ayekweboleka imali ezalayo ngoba ethi izinto azihlangani.
Wayethi lomasitanda wakhe nxa inyanga iphelile ungadlulisa insukwana wayemlanda endlini nxa ekuswelile akulande emsebenzini, lapho uyabe esebophe ubuso uthole lamehlo esebomvu gebhu okwecinathunjana elifelwe ngunina ngoba lisazi ukuthi akusekho ozalitotoza, yikho nje wayethi ukubona kungcono ukuthi aziyele emaphandleni ngoba impilo yakhona ingcono, lokhuyana okokukhangelelana phansi abantu bemaphandleni sekwaphela ngoba lakho okunengi okusemadolobheni sekukhona lemakhaya.
Ayixabene.
