YiNtatheli kaMthunywa
UMONGIKAZI osebenza esibhedlela sePlumtree District Hospital usemiswe umsebenzini ngesikhathi kusenziwa uphenyo ngensolo zokuthi uqile izakhamizi, labafuna ukufundela umsebenzi wokuba ngomongikazi izinkulungwane zamadola eMelika.
Umfakazi osebenza esibhedlela sePlumtree District Hospital utshele iZimpapers News ukuthi uNkosazana Eustina Tshuma usemiswe umsebenzini.
“Liqiniso ukuthi umongikazi osolwa ngokuqila abantu imali umiswe umsebenzi kusenziwa uphenyo,” kutsho umthombo lo.
UTshuma usolwa ngokusebenzisa indaba ezilusizi, ezigoqela ukuthi abazali bakhe bayagula, ukuze aboleke imali ebantwini. Kuthiwa wabuye wathembisa abantu abafuna ukufundela ukuba ngomongikazi ukuthi uzabatholela indawo zokufundela lumsebenzi nxa bengamnika imali.
Abanye njalo bathi baqilwa nguTshuma imali ezifika ku-US$1 500 esithi uzadingela abantwabazo indawo zokufundela ukuba ngomongikazi.
Kubikwa wayebatshela ukuthi ulobudlelwano labantu abasebenza kugatsha olubona ngezeMpilakahle kanye lokondliwa kuhle kwabantwana, ababengamsiza ukuthola indawo zokufunda eBrunapeg Mission eseMangwe District.
Insolo lezi zitshiye ezinye imuli zilahlekelwe yimali, njalo ezinye zikhala ngokuthi zathengisa imbuzi lenkomo ukuze zithole imali yokufundisa abantwabazo.
Abanye abaqilwa nguTshuma bathi wayesiba lolaka nxa sebebuza imali zabo.
Kubikwa ukuthi abanye balabo abathi baqilwa sebesungule iqembu kuWhatsApp elibizwa ngokuthi
“Scammed by Eustina”, lapho abatsho khona izikhalazo zabo njalo bexoxisana ngokuyabikela amapholisa ngendaba le.
