Online Reporter
YiNtatheli kaMthunywa
Ikhansili yeHarare iqale ukufafaza umuthi wokubulala insikizi ebesezihluphile elokitshini elidala leMbare.
Lokhu kuza ngemva kokuba ikhansili le iqinisekise ukuthi sokugcwele insikizi kulelilokitshi.
UMgcinisihlalo obona ngezokukhulumisana ekhansilini yeHarare uStanley Gama uthe sebeqalile ukufafaza ezitezi zeMatererini leMatapi lapho okulabantu abanengi abahlala khona.
UGama ukhuthaze izakhamizi ukuthi zisebenzisane lezisebenzi zekhansili ezifafazayo.
Uthe ukuminyana, ukungahlanzeki kwendawo yikho okubangela ukumemetheka kwezibungwana.
“Izakhamizi endaweni ezibalisiweyo kumele zilungiselele futhi zisebenzisane lamaqula ethu.
“Ngaphandle kokufafaza imithi, njengekhansili sizafundisa izakhamizi ngembangela kunye lendlela zokuvikela ukumemetheka kwensikizi endaweni ezilabantu abanengi.”
Ugcizelele ngokuqakatheka kokubambisana lezakhamizi.
“Ukufafaza kodwa akusoze kuqede uhlupho, insikizi zicatsha emphethweni yembheda, amasofa, amakhabothi kunye lemiduli kungakho-ke kumqoka ukuthi izakhamizi zihlanze indawo lezi lapho okungafiki khona imithi,” kutsho yena.
Kusenjalo ukhansila uSimbarashe Chanachumwe uthe ugatsha olubona ngezeMpilakahle lubanike impahla yokufafaza izindlu zonke zeMbare.
“Sihlangane labakhokheli boats have lwezeMpilakahle, ikhansili yeHarare labanye abathintekayo (ngeSonto) ukuze silungisise uhlupho lolu,” kutsho uKhansila uChanachimwe.
“Imuli ezinengi bezingalali abanye balamanxeba ngenxa yensikizi.
Luyaqhubeka ebulenjini
“Uhlupho lolu lwaqala ngomnyaka ka2020 njalo ezinye imuli zazama ukulwisa udubo lolu ngokutshisa impahla kunye lengubo kodwa akuzange kuphele.
“Sesivumelane ukufafaza zonke izindlu zeMbare, izitezi kunye lezitolo.
“Sikhuthaza izimuli zeMbare ukuthi zivulele izikhulu zezempilakahle izindlu zazo ukuthi zifafaze.
“Ngeke senelise ukuqeda udubo lolu nxa ezinye izindlu zingasoze zifafazwe.”
Ezinye izakhamizi zisola ukugqitshwa kwamabhele kule indawo ukuthi yikho okubangela insikizi lezi.
“Sinakanela ukuthi amabhele agcinwa ezindlini zeMbare kunye lezitezi yowo abangela udubo lolu. Nxa amabhele la kungasabonakala ukuthi kuthiweni ngawo ngeke udubo lolu luphele.
“Ezinye impahla zendlini kunye lezibi ezingabuthwayo ziyabangela ukumemetheka kwensikizi lezi.”
