Online Reporter
UPhakamile wagula okwesikhathi eside kwazanywa ezibhedlela zikaHulumende lakubodokotela abazimele bodwa kwehlula. Baqonda kubosiyazi ababona okusemakhazeni okungabonwa lilihlo lenyama lakho kwehlula. Umkakhe ngumuntu owayelemali futhi engeqiwa yisidwaba.
Wayebukhali mhlawumbe kusenziwa yimbenge yakhe yamahewu ahlanganiswe lokunye eyayihlala ngaphansi kombheda.
UPhakamile waze wakhulelwa ngumkhuhlane wedlula emhlabeni. Wawuthi nxa umkhangele ubone impawu zegcikwane lengculaza; inwele ziphephuka njalo esezacale.
Ngaleyo minyaka kwakungakabi lamaphilisi okucindezela igcikwane leli ama-antiretroviral drugs.
Ngenxa yokuthi umkakhe wayelemali lamabhizimusi umdeni wahlala phansi kwakhethwa umnawakhe ukuthi ayokondla abantwana.
Lokhu bakwenza ngoba bengafuni athathe omunye umfazi ngoba besesaba ukuthi amandla omntanabo azatshabalala njengamazolo esedliwa ngomunye umfazi oyabe esethethwe.
Wazama ukwala wakhala emini lebusuku ngoba nanku phela basebemphosela exhegwini yena wayelejaha lakhe ababethembisane izulu lomhlaba.
Waqala engafuni ukuthi lelixhegundini limthinte kwaya waze wejwayela ngenxa yokuthi akula muntu owayekwazi okubulele udadewabo, laye kungeminyaka mingaki waqala ukugula futhi impawu ayelazo zazifana lezikadadewabo. Khonokho wedlula emhlabeni.
Wezwakala uyise wamantombazana la, ekhuluma yedwa ethi nangu umuntu engiqedela abantwabami wakhohlwa ukuthi nguye owaqinisa ikhanda ethi uvikela inotho yendodakazi yakhe kanti uzokhela amalahle ekhanda.
Ensukwini zalamuhla akusavumi ukuthi omunye angadlula emhlabeni omunye ayengena kungazange kuhlolwe igazi ngoba imikhuhlane eminengi ithelelwana emacansini umdeni uphele du.
Ayixabene!
