Online Reporter
Nkosilathi Sibanda
KULANDELA ukukhethwa ukuthi amele ibandla leZanu-PF kukhetho lwePhalamende olweNsiza North, uKhomuredi Moses Langa uthe uzimisele ukuba yisithunywa sabantu, aqhubeke ngemisebenzi yokuthuthukisa uzulu.
UKmrd Langa unqobe abanye abeZanu-PF abayisitshiya galombili abakade bencintisa kusigaba sama-primary, kukhetho oluqhutshwe ngempelaviki edluleyo.
Ukhetho lolu luvele ngemva kokudlula emhlabeni kukaFarai Taruvinga. NgoLwesibili emini, uKmrd Langa utshele iphephandaba likazulu ukuthi usekulindele ukuya ePhalamende.
UKmrd Langa ungumgcinishlalo wogatsha lwabatsha kuZanu-PF eMatabeleland South, ophinda abengusomabhizimusi osesebenze gadalala ukuphakamisa intsha kwezokwemba igolide, ukuvula amabhizimusi, ezemfundo lokuphakamisa abesifazane.
“Yinjabulo kimi lakumalunga eZanu-PF lapha eNsiza North ukuthi ngikhethwe ukuthi ngibe ngummeli walesi isigaba kukhetho oluzayo. Ngibonga wonke amalunga kusukela kumgcinisihlalo webandla leZanu-PF eMatabeleland South uKhomuredi Nqobizitha Mangaliso Ndlovu lenkokheli zonke.
“Ngibonga intsha yeMatabeleland South, omama lazo zonke ingatsha zebandla. Ngithi kubo, kasisukumele phezulu sikhokhele umkhankaso wethu, sigcine isihlalo sethu ePhalamende,” kutsho uKmrd Langa.
Uthe okumkhuthaze ukuthi afune ukuba ngummeli weNsiza North ePhalamende, ngabantu bakulindawo.
“Ngithunywe ngabantu bakithi, abangibone njengomuntu ongabalungisela inkinga zabo esigabeni. Ngiyazehlisa ngalokhu. Ngiphethe amathemba lamaphupho abo empumelelo. Njengoba isihlalo seNsiza North ePhalamende besiphethwe yibandla elibusayo, iZanu-PF, sithembisa ukuthi kuzahlala kunjalalo.”
