admin
Buhlebenkosi Gaule
INTSHA ephatheka kwezokuthunga izabe ilomcimbi weFashion Design Expo Zimbabwe ngoMgqibelo kuyonale impelaviki eMarquee eHillside koBulawayo ngenhloso yokubakhuthaza ukuthi basungule amankampani abo ukuze benelise ukuziphilisa.
Kubikwa imali ezatholakala kumcimbi lo enye yakhona izaphiwa abalomkhuhlane wemvukuzane koBulawayo ukuze ibaphathise.
UNkosikazi Raquel Fouche onguMqondisi weFashion Design Expo le, uthe njengenhlanganiso yabathungi bahlose ukuncedisa intsha efuna ukuqala amabhizimusi okuthunga impahla.
Kumkhosi lo kukhangelelwe ukuthi kudibane abatsha abathungayo abavela endaweni ezitshiyeneyo bezobukisa ubuciko babo.
“NgoMgqibelo ozayo kuzabe kulomkhosi wokubukisa eHillside lapho intshantshu zokuthunga phakathi kwentsha koBulawayo ezizabukisa khona imithungo yabo etshiyeneyo egoqela izigqoko, izicathulo, ingwane lezikhwama,” kutsho uNkkz Fouche.
Uqhubekele phambili uNkkz Fouche esithi iqembu leFashion Design lisebenza lentsha eleminyaka esukela kwengu-13 kusiyaphambili ngenhloso yokubancedisa ukuthi baqalise ababhizimusi abo okuthunga angabaphilisa.
“Kulezinsuku intsha enengi ikhala ngokuthi akulamisebenzi kodwa thina njengeFashion Design sikhuthaza intsha ukuba bafunde ukuzisebenza bangalindeli ukuqhatshwa.
“Lokhu sikwenza ngokubathi baphatheke kuzifundo ezingabancedisa ukuqala amabhizimusi njalo kulaba abakwazi ukuthunga labafuna ukuthunga siyabancedisa njalo ngezifundo,” kutsho uNkkz Fouche.
Iphephandaba likazulu lizwe njalo ukuba imali ezatholakala kumkhosi lo izasetshenziswa ukuphathisa abalomkhuhlane wemvukuzane abasezibhedlela ezitshiyeneyo koBulawayo.
“Njengeqembu elisebenza labantu abatsha asibafundisi ukuthunga kuphela kodwa sifuna bakwazi njalo ukuncedisana labantu abahlala labo kungakho-ke enye imali ezatholakala kulowomkhosi wokubukisa izancedisa abantu abalomkhuhlane wemvukuzane ezibhedlela ezitshiyeneyo zakoBulawayo,” kuchasisa uNkkz Fouche.
UNkkz Fouche uphethe ngokunxunsa bonke abakwazi ukuthunga ukuthi babuye embukisweni lo.
Online Reporter