adminSengikhulile kodwa kangithathanga
Khulu linjani. Ngiyajabula ukuba lethuba lokuxoxa lawe ngohlupho lwami. Khulu ngiyindoda eleminyaka yokuzalwa engu-35. Udubo yikuthi angilamfazi njalo angilamntwana.
Angikaze ngithathe Khulu. Abanye bathi mhlawumbe ngalungiswa ngumama yikho nje ngisehluleka khona ukukhombisa. Kuyangehlula ukulanda owesifazane ngimtshele ukuthi ngiyamthanda. Angikaze ngibe lentombi.
Kulomunye untombazana engake ngezwana laye kodwa ngathi ngibona esefuna sithandane ngahle ngaqala ukumbalekela. Ngenzeni Khulu? Abantu bathi ngiyaloya. Ngifisa ukuba lemuli kodwa hayi kuyala.
Impendulo
Ngiyaphila mzukulu. Indaba okhuluma ngayo ingenza ngihlobe. Into ekhona engikutshela khona isalukazi leso esingumama wakho aluba sasifuna ukukubulala sasizakukhamela emabeleni aso. Labo odingindaba abakutshela ngokuthi unyoko ukwenzenjalo bagangile. Impilo yakho lapho okhona khathesi yeyeme kunyoko. Bana nje lesibindi mfana wami uqome intombi.
Ngilesidina nginceda
Ngilohlupho lokungatholi umendo Khulu, ngingumama oleminyaka engu-33. Ngingathola umngane wesilisa uyangitshiya kungela sizatho. Nxa ngidinga uncedo ebantwini bathi ngilesidina abanye bathi ngile-spiritual husband.
Ngicela uncedo Khulu ukuthi udubo lolu ngingaluqeda njani, sengizwile ngokudlelwa imali zinyanga labaphurofethi kungatshintshi lutho empilweni yami.
Impendulo
Umbuzo lo unzima ngoba abantu abahlawulisa abantu beselapha isidina ngingakutsho ephepheni ngiyabe sengitshela ezinye inyanga imfihlo yami. Ingcazelo ngilayo, ubuye sikhulume sikhangelene. Inhlupho ezinje ngangithande ukuzwa ukuthi ulabantwana na?
Akulamuntu ongehlukana lomtshavava wentombi enjengawe kungelasizatho senzalo phakathi. Ulabantwana kumbe awulabo? Tshela mina ingani olabahlanu uyenda. Ngiphendula khonapho.
Kangisenelisi ukuchitha
Khulu ngiyindoda eleminyaka engu-70 ngilonkosikazi njalo silabantwana abathathu njalo bonke sebelemizi yabo.
Uhlupho lwami yikuthi kangisenelisi ukuchitha njengalokhu engangikwenza kudala. Ngake ngaya esibhedlela ngelatshwa kodwa kuyala ukuphela. Sengicabanga ukuthi mhlawumbe ukhona owangiphosayo ukuze ngingenelisi ukudla imali yabantwabami ngoba imali yonke iya kubodokotela. Nxa ekhona ongangisiza sengidiniwe ngokukhipha imali kungelamehluko obakhona.
Impendulo
Mngane wami iminyaka yakho le ibala iminyaka yokudinwa kwemithambo yomuntu. Kulinkulumo kudingakala ukuthi ukwazi ukuthi nxa usukhulile uyavaleka umchitho kodwa kubuhlungu. Okwakho kubuhlungu na? Amadokotela athini?
Okungididayo yikuthi kubuhlungu na nxa uchitha ngenxa yokuthi imithambo isidiniwe. Into le mfowethu izamele ukudla okunje okunambithekayo, okudakayo kusukela kutiye ngoba layo ilomdakamizwa omkhulu.
Ungananzelela uyekele ukudla okunambithekayo okumunyu ucele ukuthi ungadli inyama elamafutha ngoba konke lokhu kuyadaka imizwa. Kunengi ukudla okungayisibotshwala okudinisa imizwa yokuchitha. Okunengi kubangelwa yikudla okudlayo. Ngibhalela njalo. Ugogo usaphila yini? Nxa ephila ungitshele senze indlela zokuthi sibonane
Online Reporter