Londile Moyo
Sithandile Mpofu
INTSHA yebandla leSeventh-day Adventist ngaphansi kweWest Zimbabwe Conference iveze uthando ngokusiza umphakathi ngesikhathi seGlobal Youth Day (GYD) ngokwenza imisebenzi ehlukeneyo ehlose ukuncedisa kumpilakahle kazulu.
Okumqoka kakhulu kulolu uhlelo kube yikunikela i-111 pints zegazi, okuncede kakhulu ekunciphiseni ukuswelakala kwegazi elidingwa ezibhedlela.
“Sidinga ama-pints egazi angaba ngu-88 ngelanga ukuze senelise izibhedlela zethu,” kutsho u-Anele Moyo oweNational Blood Services Zimbabwe.
“Lokhu okwenziwe yintsha yebandla leSabatha kuyinto encomekayo. Siyabancoma ngokuthatha inyathelo lokwenza umehluko.”
\
Ngaphandle kokunikela ngegazi, intsha le, iqhubekele phambili yenza eminye imisebenzi yosizo nanko banikele ama-bed sheets angu-120 eMpilo Central Hospital ku-Ward A1.
Baphinde baletha izipho njalo eSt Francis Home lokuhlanza indawo zomphakathi njengokuhambelana lemisebenzi yebandla yokuthuthukisa impilo zabantu.
Ngaphezu kwalokho, intsha ivakatshele e-Anju Farm Prison lapho enikele khona amalembu okuzathungwa ngayo impahla yezibotshwa kunye lezinto zokugeza. Baphinde badlala imidlalo lezibotshwa, okukhuthaze ubudlelwano obuhle lokwethembana.
Umkhokheli wentsha kuWest Zimbabwe Conference, uMfundisi Kiviem Dube, uthe uhlelo lolu luyindlela yokutshengisa ukholo ngemisebenzi.
“Siyakholwa ekutshengiseni uthando ngokusebenza, sibhekane lendingeko zabantu lokuthi silethe ithemba ngendlela ebonakalayo,” kutsho uMfundisi Dube.
IGlobal Youth Day yisikhathi esenziwa minyaka yonke kubandla lamaSabatha, lapho intsha emhlabeni wonke ikhuthazwa ukuphuma phandle kwebandla iye emphakathini
Online Reporter