Online Reporter
Nkosilathi Sibanda
KULANDELA ukuzakhela udumo ngokudlala kuhle kumincintiswano ye-squash, esiba yintshantshu ilizwe lonke, uRyan Gwizima ucabange ukuthi avakatshele usodolobho wakoBulawayo, njenjongo yokumxoxelela ngokuphumelela kwakhe.
UGwizima, oleminyaka engu-19 yokuzalwa, ngoLwesine ngeviki edluleyo ufike ehofisini kaDavid Coltart, kumhlangano ochazwe ngokuthi uvule usodolobho amehlo ngokwenzakala kumdlalo we-squash kwabasakhulayo kuleli.
Umdlali lo uhlose ukuthi abengumdlali wakuqala ukumela iZimbabwe kuma-Olympics ngo2028, nanko phela umdlalo we-squash uzabe usungulwa kumidlalo le.
Usodolobho uColtart, ngokutsho kombiko ovele ekhansilini, uveze ukuthi uyajabula ngokuhlangana loGwazima ofike wamchasisela ukuthi wenelisa njani ukuba yintshantshu yelizwe lonke.
Uthe ukuphumelela kwabatsha kwezemidlalo kubaluleke kakhulu kunhlelo zokuthuthukisa lokumaketha ilizwe.
UGwazima ubike ukuba ufuna ukufeza iphupho lakhe lokuyadlalela ilizwe kumincintiswano yama-Olympics ngo-2028, eLos Angeles eMelika.
Ebuzwa ngokuhlangana kwakhe loColtart, uGwazima uthe: “Kube ngumhlangano omuhle sibili. Bengisethula imendulo zami, ngitshengisa engakwenza kumincintiswano edluleyo.
“Ngikhangelele ukuthi ngikhethwe kuqembu leZimbabwe elama-Olympics ka2028.
Ngaleso sikhathi ngizabe ngileminyaka engu-22 yokuzalwa.
Ngihlose okukhulu. Nxa ngingehluleka ukuba yintshantshu yomhlaba, ngiza zama ukuthi ngidlale ngcono,” kutsho umdlali lo.
