Online Reporter
Amos Mpofu
AMAQEMBU edlula amatshumi amathathu, azintshantshu kumdlalo we-handball eSouthern Africa, akhangelelwe ukuthi atheleke kuleli, elande umqhudelwano wakuqala oweBinga Beach Handball.
Umqhudelwano lo uzaba mhlaka 6 kusiya ku 7 Mpalakazi.
Ngokutsho kweZimbabwe Handball Federation (ZHF), imidlalo izaqhutshwa ngendlela yamaqoqo, kulandela isigaba sama-knockout, kuze kuyefika kowokucina.
Umongameli weZHF uTaurai Muberekerwa uthe kuzakuba lamaqembu akuleli lamanye avela emazweni abalisela Eswatini, South Africa leZambia.
Uthe umqhudelwano wabo uzaphakamisa umdlalo wakuleli kunye lokukhankasela ezokuvakatshelana, nanko iBinga ibalelwa kundawo ezikhanga izivakatshi.
“Umncintiswano lo uzafaka iZimbabwe njengelizwe elihamba phambili kwezokuthuthukisa umdlalo we-handball kuzwekazi le-Africa,” kutsho uMuberekwa.
“Sithethe amanyathelo wokuthi sidonse amehlo enhlanganiso ye-International Handball Federation, ngokutshengisa ukuzimisela kwethu ekukhuliseni umdlalo.”
Umncintiswano weBinga Beach Handball lo uzaqhutshwa ngaphansi kwendikimba ethi: “Qeda ukusetshenziswa kwezidakamizwa”. Inhloso yemidlalo, ngokubika kukaMuberekwa, yikuthi kuhlanganiswe abasakhulayo emdlalweni, kuthuthukiswe umphakathi lokukhuthaza ezempilakahle.
Kodwa, uMuberekwa uthe kumalungiselelo abo kube lenkinga ezithile ezigoqela ukudlulisa impahla esetshenziswa ku-handball edlalelwa etshebetshebeni.
“NgoMpalakazi ka2024, inhlanganiso ye-IHF yasinikeza impahla esetshenziswa ku-handball edlalela etshebetshebeni. Kodwa, ngenxa yokuswelakala kwemali kunhlanganiso yethu, bekunzima ukudlulisa impahla le.
“Okwakhathesi silesikwelede esingange US$16 000 ekugcinweni kwalimpahla. Lokhu kusibisele emuva.”
Kumaqembu akuleli, umncintiswano lo ubhekwe ngabomvu. Umqeqetshi wePowerhouse Handball Club, uBekithemba Nkala uthe: “Lo akusimncintiswano kuphela, kodwa kumayelana ngokubambana njengamaqembu adlala ihandball, ukuthuthukiswa kwamathalenta kunye lokuphakamisa umdlalo e-Africa.
“Sithanda ukunxusa bonke abathanda umdlalo wethu ukuthi babuye ngobunengi babo ngoba kuzabe kumnandi eBinga,” kutsho uNkala, ophinda abengumqeqeqetshi weZimbabwe Under-16, eWanezi High School leqembu labesifazane eleNational University of Science and Technology.
Umqeqetshi we-The Vipers, iqembu leGweru, uTashinga Dembedza uthe umncintiswano lo uzancedisa abadlali ukuthi bathole ithuba lokutshengisa ithalenta labo.
“Umncintiswano lo uyinkuthazo kubadlali njalo lithuba elihle lokudlala ihandball etshebetshebeni. Silabadlali abangu-30, abesilisa labesifazane.
“Sibonga iZHF ngemizamo yabo yokuthuthukisa umdlalo lokukhuthaza abasakhulayo ukuthi bawudlale, benqabele ukusebenzisa izidakamizwa.”
