adminYiNtatheli kaMthunywa
ABALIMI abavela ezigabeni ezitshiyeneyo zelizwe sebekhuthazwe ukuba bangasebenzisi imbawula ezilugwini besenzela ukukhudumeza inkukhu kumbe amathendele ngoba intuthu yakhona ilakho ukuzihitsha zife.
Kubikwa esikhathini esinengi abalimi ikakhulu abafuya inkukhu zohlobo lwama-broilers kumbe amathendele bande ukulala befakele inkukhu zabo imbawula ukuze zingagodoli ebusuku, lokhu kubikwa kuyingozi ngoba umlimi elakho ukucina eselahlekelwe ngoba zilakho ukuhitshwa yintuthu yembawula.
Ekhuluma lephephandaba leli omunye udokotela wezifuyo uDokotela uThabani Sibanda okunhlanganiso yeLivestock Production Department uthe kuqakathekile ukuba abalimi bangasebenzisi imbawula ebusuku ngenhloso yokuzikhudumeza inkukhu ngoba zilakho ukuhitshwa yintuthu zife.
“Kulomunye umlimi odabuka eVungu eGweru ofelwe zinkukhu zama-broilers ezingu-200 ngemva kokuhitshwa yintuthu yembawula.
“Umlimi lo uthi walala ebasele imbawula le ezilugwini zakhe esenzela ukuba inkukhu zakhe zingabulawa ngumqando. Inkukhu lezi zacina sezihitshwa ngoba intuthu isinengi.Okwabangela ukuba inkukhu lezi zihitshwe phakathi kwesilugu,” kuchaza uDkt Sibanda.
UDkt Sibanda uqhubekele phambili wathi kungcono ukuthi abalimi bangafakeli izifuyo zabo imbawula lezi ngoba bengazazi izihlahla eziqondileyo abangazisebenzisa.
“Ezinye izihlahla zilentuthu eyingozi ngakho kuqakathekile ukuba abalimi bangasebenzisi imbawula ikakhulu ebusuku.
“Kungangcono abalimi bendlale utshani kumbe amalembu phansi ukuze inkukhu zabo zihlale endaweni ekhudumalayo hatshi ukuzifakela imbawula engacina isizibulala.Okunye njalo abalimi balakho ukusebenza izibane ezibizwa ngokuthi ngama-Infra red lights. Izibane lzi ziyakhudumeza isilugu,” kutsho uDkt Sibanda.
Online Reporter