admin
Thokozile Mbedzi
ISENGUNDABA mlonyeni inyanga yelokitshini leMakokoba koBulawayo okubikwa itshaye yachitha lemota yesinye isigulane ebiselapha.
Inyanga le, uKenneth Banda okungasatholakalanga iminyaka yakhe yokuzalwa kubikwa ngoMgqibelo mhlaka 30 Ntulikazi kwafika isigulane ilanga selisiya ngomtsha wendoda sizodinga ukuphungelwa imimoya emibi.
Kuzwakale ukuthi isigulani lesi okungasatholakalanga igama laso, safika lapho uBanda ayeloja khona sihamba ngemota yomhlobo weToyota Corolla elombala oyimpunga i-ABF-9905. Kubikwa sathi siqeda kutshayelwa amathambo sanikwa imithi salaywa ukuthi kumele sihambe ngenyawo lapho esasisukele khona sibe sesiphenduka sesizothatha imota.
Kubikwa isigulane lesi salandela umlayo lo, singazi ukuthi inyanga le ihlekela esikhewini, ithi lala laza sikwengule ngoba inyanga leyo yasala ithutha impahla zayo yatshontsha lemota yabaleka.
Ekhuluma lentatheli kaMthunywa uMnumzana Meli Sibanda omunye wabomakhelwane obone inkemenkeme le uthe lokhe elesithulu ngoba uBanda abantu bebehamba kuye besithi uyabasiza bengazi ukuthi litsotsi.
“Lokhe ngitshe amathe ngobuqili obenziwe nguBanda obehlezi lapha esigabeni sethu ezenza osiza abantu ngesiNtu kanti ulamanga litsotsi elidinga ithuba.
“Thina sibone indoda engaba leminyaka ekubo 39 isizolanda imota yayo ethi uBanda ubethe kumele abuyele ngenyawo aqale ayegeza ngomuthi ayemnike wona.
“UBanda kukhanya wamtshela ukuthi akumelanga agade imota ngoba akuhambelani lamadlozi kungakho kumele aqale ehambe ngenyawo ayegeza ngomuthi ayewuphiwe ohlanganiswe lamanzi.
“lnyanga le yamtshela ukuthi atshiye lamakhiye lakanye isigulani sakwenza lokhu yathi aphenduke mbayimbayi esezothatha imota ngoba ngaleso sikhathi umnyama kunye lamathunzi amlandelayo ayabe esemtshiyile,” kutsho uMnu Sibanda.
“Isigulani sithe siphenduka sathola inyanga isinyamalele konke lemphala zayo kungasekho ngitsho lemota yaso.
“Kubebuhlungu ngoba inyanga le ibiloja lapha yatshiya indlu itshaya umoya. Indoda le iphelelwe yaswela lokuthi izaqalela ngaphi ukuyidinga inyanga le,” kutsho uMnu Sibanda.
Isikhulumi samapholisa koBulawayo uInspector Abedinico Ncube ebuzwa ngodaba lolu uvumile wathi solufikile ehofisini yabo.
“Amapholisa axwayisa uzulu ukuba bengabotshiya impahla ayisebenzele nzima ezandleni zabantu abangabaziyo ngoba bengalahlekelwa zimpahla zabo.
“Indoda le kukhanya ibizenza inyanga kungakho sixwayisa uzulu ukuthi kumele aqaphele inyanga zeqiniso lezamanga. Sicela ongabe elolwazi olungaphathisa amapholisa ukuze umetheswacala abotshwe njalo lemota itholakale abikele amapholisa aseduzane laye,” kuphetha uInsp Ncube.
Online Reporter