admin
Thokozile Mbedzi lo Listen Ndlovu
KULEMULI yeNkulumane koBulawayo ethwaliswe amagabha avuzayo luhalabezi okubikwa ukuthi solulephose amaviki amabili luvela luphinde lunyamalale endlini njalo osolehlule abaphurofethi, ababamba inyoka (snake catcher) kanye labogatsha lweNational Parks.
Kubikwa uNkosikazi Medesi Kapasura lomkakhe uMnumzana Sydney Kapasura sebedubekile ngenyoka le okubikwa inkulu kakhulu njalo imnyama tshu evela emdulini ngemva kwama-curtain endlini yabo yokukwejisa ibhinqilike ikhonapho yenze engani izangena emakamelweni okulala ibuyele njalo lapho eqale khona andubana inyamalale.
Ekhuluma lentatheli uNkosikazi Kapasura uthe ukuhlala endlini yakhe sokuyikwenza nje kodwa bahlezi besevalweni ngoba inyoka le seyabonakala kabili.
“Lapha ekhaya sihlezi siphethe izibindi ngezandla khepha sabona inyoka enkulu ongakaze uyibone ngemva kwama khetheni ethu kabili.
“Isimanga ngenyoka le ihamba iphezulu emdulini njalo sibona ikhanda lomzimba wayo okumnyaka tshu kodwa uyayibona nje ibhinqilika khonokho nje inyamalale.
“Okwakuqala sabiza omakhelwane labo bayibona, sahlanganisa amakhanda sasesinakana ukubiza ababamba inyoka, ngempela wabuya omunye umlungu wangena endlini wathi uyezwa ukuthi endlini kulomhambaphansi kodwa laye usedinge waswela ukuthi ungabe ucatshe kuphi,” kutsho ugogo Kapasura.
UMnu Kapasura laye uqhubeke elandisa ngohalabezi olubathwalele ubhulo wathi:
“Esesukile umlungu lo kwazobuya abeSonto yesiPostoli esasibabizele ukuthi bazoyithungatha labo bayixotshe nxa kuyikuthi ngeyabantu.
Bafika bakhuleka benza imithanithani yabo andubana basuke besithembise ukuthi bazaphenduka bezoyikhipha ngemva kwensuku ezintathu kodwa abasaphendukanga lalamhla sokuze kulilanga lesitshiyagalolunye.
“NgoLwesibili ngeviki ephelileyo inyoka yaphinda yavela okwesibili sabiza abeParks bafika bayidinga bayiswela basuka bazihambela.
“Sithwele nzima impela ngenxa yenyoka le asisazi ukuthi sithi ngeyabantu kumbe yinyoka sibili nanko phela yehlule bonke abazibiza ingcitshi ekukhipheni inyoka.
Nxa siyibona inyoka le iyabe ilenga ekhoneni umsila siyabe singawuboni kodwa kukhanya umzimba lekhanda njalo inkulu kakhulu lomunye umpholisa laye engahlangana laye ngisiya e-housing office wamangala lapho esebuye lami lapha engibone ngikhathazekile emgwaqweni wasengibuza ukuthi mama uhlupho lwakho ngolwani ngathi kulenyoka endlini laye wabuya wayibona inyoka le wethuka.
Nguye owasisiza sathola umlungu okhipha inyoka.
“Sikhathazekile ngodaba lolu ngoba silapha akulaleki siyesaba silala silayithe amalayithi kuze kuse.
AbeParks bathe nxa ingavela futhi sibabize.
Sihlezi simadolonzima sikhonala siyesaba.
Sicela ongabe elolwazi lokuthi singasizala njani asiphathise inyoka le ingakasibulali, asikhululekanga ngitsho lakancane,” kuphetha uMnu Kapasura.
Online Reporter