Online Reporter
Nkosilathi Sibanda
IZimbabwe Pickleball Association (ZPA) izakuba ngenye yenhlanganiso zemidlalo ezizabukisa inhlelo embukisweni weCity of Bulawayo Sports Economy Exhibition ozaqhutshwa mhlaka 16 Mabasa.
Umbukiso lo uhlelwe yikhansili yedolobho lakoBulawayo ngenhloso yokukhuthaza ukuxhumana phakathi kwenhlanganiso zemidlalo, impilo yomphakathi lentuthuko yezomnotho.
Ukubukisa kweZPA kulandela ukunxuswa okusemthethweni okuvele kubaphathi bekhansili yedolobho.
I-Pickleball ngumdlalo osukhula ngokuduma ngenxa yokuthi udlaleka kalula njalo ungadlalwa laloba ngubani, kungakhathalekile iminyaka.
UMongameli weZPA, uMthandazo Ngwenya uthe umbukiso weCity of Bulawayo Sports Economy Expo ulithuba elikhulu lokukhulisa umdlalo.
“Ukumenywa ukuthi sizobonisa umdlalo enkabeni yeCity of Bulawayo Sports Economy Expo kulithuba elikhulu kithi.
“Sifuna ukutshengisa ukuthi i-pickleball kayisiyo nje umdlalo kuphela kodwa yakha umphakathi njalo iletha inzuzo kwezomnotho,” kutsho uNgwenya.
Uthe inhloso yabo yikukhulisa inani labadlali, ukuthuthukisa amathalenta lokuvula amathuba okufakwa kwemali kulumdlalo.
“Sifuna abantu babone ukuthi bangaba yingxenye yalumdlalo lapha eZimbabwe.”
UNgwenya uthe embukisweni lo, abantu bazathola ithuba lokufunda imithetho yokuqala yomdlalo, baxhumane labadlali labaphathi, baphinde bathole ithuba ngokuba yingxenye yamakilabhu.
