Nkosilathi Sibanda
INJABULO ibhalwe ebusweni babalandeli beMainline FC kulandela ukuthola kwabo ilungelo lokudlala kuligi yeZIFA Southern Region Division One.
Iqembu leli liphakamele kuDivision One sekusele imidlalo emithathu kuphela ukuthi kuphele iligi yeZIFA Bulawayo Province Soccer League, ngemva kokunqoba iNUST nge 1-0 ngeviki edluleyo.
IMainline FC isendaweni yesibili iphethe imiklomelo engu-77, ilandelwa yiNdlovu Iyanyathela ehlezi esiqongweni seligi ilemiklomelo engu-80.
Ukubuyela kuDivision One lokhu sekunikeze iqembu leli ithuba lokuqala kutsha, njalo selibeke umgomo wokwenza kuhle kuligi le ngenhloso yokuthi ngelinye ilanga lilethe ibhola lePremier Soccer League ePlumtree.
Ukukhuphuka kwaleli qembu kuyimpumelelo enkulu nxa kukhunjulwa ubunzima elidlule kubo ngesizini edlulileyo.
Lanxa lenelisa ukuvukela ilungelo lokudlala kuDivision One enkundleni, alizange lithole ithuba lokusebenzisa ilungelo lelo ngoba i-franchise yalo yathengiswa.
Kodwa lokhu akuzange kuqede umoya weqembu leli, elaqalisa kutsha kuDivision Two njalo lasebenza nzima laze lathola elinye ithuba lokubuyela kuligi yesigaba sesibili.
Umqeqetshi weMainline FC uSiza Mguni, owaqalisa ukusebenza leqembu ngo-2018, ngemva komnyaka lisunguliwe, uthe bayathokoza ngokuphinda bathole ilungelo lokudlala kuDivision One.
“Ukuthengiswa kwe-franchise kwaba yinto eyasizwisa ubuhlungu obukhulu. Kwaba angathi silahlekelwe yikho konke ngobusuku bunye. Kodwa okwasigcina siphila yikuzazi ukuthi singobani.
“Ngokwendlela yokudlala kwadingeka ukuthi samukele isimo esikhona. KuDivision Two awutholi inkundla ezinhle kumbe amabhola afaneleyo. Ngakho satshiya ukuzama ukudlala ibhola lokubukisa. Saqalisa ukugxila entweni eziqakathekileyo ezigoqela ukuvikela amabhola ahlohlwayo, ukudlala kuhle kuma-set pieces lokuqina komzimba,” kutsho uMguni.
IMainline FC isele lemidlalo emibili, lapho ezadibana khona leHow Mine FC enkundleni yayo, ibisamukela iSt Daniels ekhaya, ilubhekise ekucineni kwesizini ilethemba lokuqhubeka ngokutshengisa amandla ayo.
