admin
YiNtatheli kaMthunywa
AMAQEMBU womdlalo wenguqu kuligi ephakemeyo yakuleli, azadlala kumadolobho lapho aphuma khona, kusenqatshelwa iCovid-19, nanko iPremier Soccer League isibike ukuba ibhola lingaqala.
Umaqhuzu wePSL uKennedy Ndebele, wethule lumbiko kugwalo oluchaza indlela inhlanganiso eqoqe ukuqhuba ngayo imidlalo yayo kulisizini.
UNdebele uthe kuzakuba lomncintiswano wamaqembu wonke ozavula inkundla njalo uzadlalwa okwamaviki ayisitshiya galombili.
IPSL ibike ukuba ihlale logatsha lwayo lwezempilakahle, kwavunyelwana ukuthi imidlalo le izakuba semadolobheni amane kuphela.
Inkundla ezikhethiweyo zibalisa iNational Sports Stadium eseHarare, iBarbourfields koBulawayo, Sakubva (Mutate), Mandava (Zvishavane).
Inkundla zeMorris Depot leBaobab kuthiwa zingasetshenziswa nxa kudingeka phakathi kwemidlalo.
“Ukuze siqale kakutsha inguqu ngendlela evikelekileyo, kulomqhudelwano ozasungulwa. Senqabela ukumemetheka kweCovid-19 okungadalwa yikuhamba kwamaqembu.Amaqembu azafakwa kumaqoqo amane,” kutsho uNdebele.
“Amaqembu kumele athwale abadlali besiya lolonga lasemdlalweni. Izisebenzi labadlali bamaqembu bakhuthazwa ukuthi belandele izeluleko zokwenqabela iCovid-19, lokuhlolwa igcikwane kuzaqhutshwa.”
Uthe akusoke kube lababukeli kumidlalo yonke.
“IPSL izakhulumisana lamankampani kamabonakude ukuze ibhola likhitshwe mhla welanga. Amaqembu azathola inzuzo yemali kulokhu.”
UNdebele uthe inhlanganiso yabo izadinga ukucetshiswa lugatsha lwezempilakahle kuHulumende mayelana ngokuhlatshwa i-vaccine.
“Uhlelo lwe-vaccination luzaqhutshwa yiPSL Sports Medicine Committee. IPSL izabeka isicelo kugatsha lwezempilakahle ukuthi inikwe kumbe izithengele imithi efaneleyo.”
Indlela amaqembu ahlelwe ukuthi azadlala ngayo:
Group 1 (Harare): Caps United, Dynamos, Harare City, Herentals, Yadav, ZPC Kariba
Group 2 (Bulawayo): Highlanders, Bulawayo City, Bulawayo Chiefs, Chicken Inn
Group 3 (Mutare): Manica Diamonds, Cranborne Bullets, Black Rhinos, Tennax
Group 4 (Zvishavane): FC Platinum, Ngezi Platinum Stars, Triangle, Whawha
Online Reporter